Молитва ко Господу перед иконой Троица Ветхозаветная
 |
|
Молитва ко Пресвятей Троице
Пресвятая Троице, единосущная Державо, всех благих Вина, что воздадим Тебе за вся, яже воздала еси нам грешным и недостойным прежде, неже на свет произыдохом, за вся, яже воздаеши коемуждо нас по вся дни, и яже уготовала еси всем нам в веце грядущем! Подобаше убо, за толикия благодеяния и щедроты, благодарити Тя не словесы точию, но паче делы, храняще и исполняюще заповеди Твоя: мы же, отрастем нашым и злым обычаем внемше, в безчисленныя от юности низвергохомся грехи и беззакония. Сего ради, яко нечистым и оскверненным, не точию пред Трисвятое лице Твое безстудно явитися, но ниже имени Твоего Пресвятаго изрещи довлеяше нам, аще бы не Ты Сама благоизволила, во отраду нашу, возвестити, яко чистыя и праведныя любя, и грешники кающияся милуеши и благоутробне при-емлеши. Призри убо, о Пребожественная Троице, с высоты Святыя Славы Твоея на нас, многогрешных, и благое произволение наше, вместо благих дел, прииими; и подаждь нам духа истиннаго покаяния, да возненавидевше всякий грех, в чистоте и правде, до конца дней наших поживем, творяще пресвятую волю Твою и славяще чистыми помыслы и благими деяньми сладчайшее и великолепое имя Твое. Аминь.
Молитва к Богу Отцу
Всемогущий Владыко, премудрый и всеблагий Господи, светоначальнаго Сына Пребезначальный Родителю, и Животворящаго Духа Твоего вечный и присносущный Самоизводителю, Егоже величество неизчетно, слава несказанна, и милость безмерна, благодарим Тя, яко воззвал еси нас от небытия и почтил еси драгоценным образом Твоим, яко даровал еси нам недостойным не точию познавати и любити Тя, но еже сладостнейше есть, и Отцем своим нарицати Тя. Благодарим Тя, Боже милосердия и щедрот, яко преступивших заповедь Твою не оставил еси нас посреди греха и сени смертныя, но благоволил еси Единороднаго Твоего Сына, Имже и веки сотворены суть, послати на землю нашего ради спасения, да вочеловечением Его и страшными страданьми мучительства диаволя и тли смертныя свободимся. Благодарим Тя, Боже любве и сил, яко, по вознесении на небо дражайшаго Спасителя нашего, умолен быв Крестом Его, низпослал еси и Духа Твоего Пресвятаго на избранные Его ученики и апостолы, да, силою богодухновенныя проповеди их, озарят весь мир нетленным светом Евангелия Христова. Сам убо, Человеколюбивый Владыко, услыши ныне смиренную молитву недостойных чад Твоих, да якоже создал еси нас за едину Твою благость, искупил еси ны за едино благоутробие Твое, тако и спасеши нас по единому безприкладному милосердию Твоему: зане от дел наших ниже следа спасения имамы, но чаяние праведныя мести и отлучения от пресветлаго лица Твоего: аще бо и о едином праздном глаголе взыскано будет в день Суда и испытания, о неизчетных наших беззакониях, имиже согрешихом пред Тобою, кий, бедные, имамы воздати ответ; сего ради весьма от дел наших отчаявшеся оправдания, к Твоей единей, всяк ум и всяко слово превосходящей, прибегаем благости, юже, аки твердое основание надежды имуще, молим Тя: согрешихом, очисти, Господи! Беззаконновахом, прости, Владыко! Прогневахом Тя, примирися, Долготерпеливе! И сохрани прочее ум, совесть и сердце наше от скверн мирских, избави и спаси ны от многомятежныя бури страстей и грехопадений, вольных же и невольных, ведомых и неведомых, и в тихое управи пристанище веры, любви и упования жизни вечныя. Помяни нас в милости Твоей, Господи, даруй нам вся, яже ко спасению, прошения, паче же чистое и безгрешное житие; сподоби нас любити Тя, и боятися от всего сердца нашего, и творити во всем волю Твою святую, молитвами Пречистыя Владычицы нашея Богородицы и всех святых Твоих, яко Благ и Человеколюбец Бог еси, и Тебе славу и благодарение и поклонение возсылаем, со Единородным Твоим Сыном, и со Пресвятым и Благим и Животворящим Твоим Духом, ныне и присно, и во веки веков. Аминь.
Молитва к Богу Сыну
Единородно Сыне и Слове Божий, изволивый нашего ради спасения воплотитися и смерть претерпети, ныне же, и с Пречистою Плотию Твоею, на небесех на Престоле со Отцем седяй, и всем миром уп-равляяй, не забуди милосердием Твоим нас, долу сущих и многими напастьми и скорбьми искушаемых, иже аще и весьма нечисти и недостойни есмы, но в Тебе, Спасителя и Господа нашего, веруем и иного Ходатая и надежды спасения не вемы. Подаждь, о Искупителю всеблагий, да памятуем выну, коликих мучений души и Тела Твоего потребно бяше, во еже удовлити за грехи наши вечной правде Отца Твоего, и како даже до ада со Креста низшел еси пречистою душею Твоею, да нас власти и мучительства адова свободиши: памятуя же о сем, да блюдемся от страстей и грехов, бывших виною лютых страданий и смерти Твоея, и да любим правду и добродетель, еже всякаго дара Тебе в нас приятнейше есть. Яко искушенный по всяческим, сам веси, о Всеблагий, коль велика есть немощь духа и плоти нашея, а враг наш силен и злохитр, яко лев рыкая ходит, иский кого поглотити: не остави убо нас Своею всесильною помощию, и буди с нами выну, храня и покрывая, наставляя и укрепляя, радуя и веселя дух наш. Мы же, на лоно любве и милосердия Твоего повергающеся, весь живот наш, временный и вечный, Тебе предаем, нашему Владыце, Искупителю и Господу, моля из глубины души, да, имиже веси судьбами, сотвориши нам прейти безбедно мрачную жития сего земнаго юдоль, и достигнута Богокраснаго чертога Твоего, его же обещал еси уготовати всем, верующим во имя Твое, и последующим Божественным стопам Твоим. Аминь.
Молитва к Богу Духу Святому
Утешителю всеблагий, Душе истины, от Отца предвечно исходяй и в Сыне выну почиваяй, независтный Источниче дарований Божественных, разделяя их коемуждо, якоже хощеши, Им же и мы недостойнии освятихомся и назнаменани есмы в день крещения нашего! Призри на молитву раб Своих, прииди к нам, вселися в ны, и очисти душы наша, да будем уготовани в жилище Пресвятыя Троицы. Ей, о Всеблагий, не возгнушайся нашея нечистоты и ран греховных, но исцели я всеврачующим помазанием Твоим. Просвети наш ум, да разумеем суету мира и яже в мире, оживи нашу совесть, да неумолчно возвещает нам, яже подобает творити и яже отметати, исправи и обнови сердце, да не источает прочее день и нощь помышлений злых и желаний неподобных, укроти плоть и угаси росоносным дыханием Твоим пламень страстей, имже помрачается в нас драгоценный образ Божий. Духа праздности, уныния, любоначалия и празднословия отжени от нас, подаждь же нам духа любви и терпения, духа кротости и смирения, духа чистоты и правды, да, исправив разслабленныя сердца и колена, неленостно течем по пути заповедей святых, и тако, избегая всякаго греха и исполняя всяку правду, сподобимся улучити кончину мирну и непостыдну, внити в Иерусалим Небесный и тамо поклонятися Тебе, купно со Отцем и Сыном, поя во веки веков: Троице Святая, слава Тебе!
---
МОЛИТВЫ В ДЕНЬ СВЯТОЙ ТРОИЦЫ
После Божественной литургии в светлый праздник Пресвятой Троицы служится торжественная Троицкая вечерня с тремя коленнопреклонными молитвами.
Все три читаемые молитвы составлены св. Василием Великим (329-379 гг.).
Первая молитва – Богу Отцу. Мы исповедуем пред Отцем Небесным наши грехи и просим Его помиловать нас ради великой жертвы сына Его, Господа нашего Иисуса Христа.
Вторая – Господу Иисусу Христу о нас грешных, на земле живущих. Мы просим Господа даровать нам Божественнаго Духа.
Третья – Господу Иисусу Христу об усопших в вере наших братьях. Мы просим Господа, сошедшего во ад и сокрушившаго силу диавола, упокоить наших усопших отцев и братьев в месте светле, в месте злачне, в месте покойне.
Только в редкие дни, особые моменты богослужебного круга возносится в храме непосредственная, прямая молитва Богу Отцу. В круге дневных служб такова евхаристическая молитва пред престолом на Божественной литургии между пением «Верую» и «Отче наш», когда воспоминательно приносится бескровная жертва Сына Божия. Но в день Святой Троицы – живое сознание, что Спасителем нашим разрушены все преграды, исполняет верных священного дерзновения во Христе к Богу Отцу Единому, ибо Христов – Сын в дому Своем; Егоже дом мы есмы.
"Пречисте, нескверне, безначальне, невидиме, непостижиме, неизследиме, непременнне, непобедиме, незлобиве Господи, Едине имеяй безсметрие, во свете живый неприступнем"... Найдем ли более возвышенные слова, чем эти начальные слова первой Троицкой молитвы Богу, Неописуемом в Своем Существе?
Протопресвитер Михаил ПОМАЗАНСКИЙ
Первая молитва
Пречисте, нескверне, безначальне, невидиме, непостижиме, неизследиме, непременне, непобедиме, неизчетне, незлобиве Господи, един имеяй безсмертие, во свете живый неприступном: сотворивый ибо и землю и море, и вся созданная на них, прежде еже просити, всем прошения подаваяй,
Тебе молимся, и Тебе просим, Владыко человеколюбче, Отца Господа и Бога и Спаса нашего Иисуса Христа, нас ради человеков, и нашего ради спасения, сшедшего с небес, и воплотившагося от Духа Святаго и Марии Приснодевы, и преславныя Богородицы:
иже первее убо словесы уча, последи же и делы показуя, егда спасительную страсть претерпе, подаде нам подписание смиренным, и грешным, и недостойным рабом Твоим, мольбы приносити Тебе, в выи и колен преклонениих, о своих гресех, и о людских неведениих,
Сам многомилостиве и человеколюбче, услыши ны, воньже аще день призовем Тя, изрядне же в день сей пятдесятный, воньже по вознесению Господа нашего Иисуса Христа на небеса, и седении одесную Тебе Бога и Отца,
ниспосла Святаго Духа на святыя своя ученики и апостолы, иже и седе на едином коегождо их, и исполнишася вси неистощимыя благодати Его, и глаголаше языки иными величия Твоя, и прорекоша.
Ныне убо молящихся Тебе услыши нас, и помяни нас смиренных и осужденных, и возврати пленение душ наших, Твое милование имея о нас молящееся.
Прими нас припадающих Тебе, и вопиющих: согрешихом, к Тебе привержены есмы от утробы, от чрева матере нашея, Ты еси Бог наш.
Грехи юности нашея и неведения не помяни, и от тайных наших очисти нас, и не отрини нас во время старости, внегда оскудети крепости нашей:
Не остави нас, прежде даже нам в землю не возвратитися. сподоби к Тебе возвратитися, и вонми нам благоприятием и благодатию.
Возмери беззакония наша щедротами Твоими, сопротив постави бездну щедрот Твоих множеству согрешений наших.
Призри с высоты святыя Твоея Господи, на предстоящыя люди Твоя. И чающыя еже от Тебе богатыя милости. Посети нас благостию Твоею, избави нас от насильства диаволя: утверди живот наш святыми Твоими и священными законы.
Ангела, верна хранителя пристави людям Твоим, всех собери в Твое Царствие. Даждь прощение уповающым на Тя: остави им и нам грехи. Очисти нас действом святаго Твоего Духа: разруши яже на нас козни вражия.
К первой молитве присоединяется еще эта:
Благословен еси Господи Владыко Вседержителю, просветивый день светом солнечным, и нощь уяснивый зарями огненными, долготу дневную преити нам сподобивый, и приближитися начатком нощи: услыши моления наша, и всех людей Твоих,
и всем нам прости вольныя и невольныя грехи. Приими вечерняя наша моления, и низпосли множество милости Твоея, и щедроты Твоя на достояние Твое.
Остени нас святыми ангелы Твоими, вооружи нас оружием правды Твоея, огради нас истиною Твоею, соблюди нас силою Твоею, избави нас от всякаго обстояния, всякаго навета сопротиволежащаго.
Подаждь же нам и настоящий вечер, с приходящею нощию, совершен, свят, мирен, безгрешен, безсоблазнен, безмечтанен, и вся дни живота нашего: молитвами святыя, Богородицы, и всех святых от века Тебе благоугодивших.
Вторая молитва
Господи Иисусе Христе Боже наш, мир Твой подавый человеком, и пресвятаго Духа дар, еще в житий и с нами сый, в наследие неотемлемое верным присно подаваяй:
явленнейше же сию благодать Твоим учеником и апостолом днесь низпославый, и сих устне огненными утвердивый языки:
имиже весь род человеческий боговедение своим языком в слух уха приимше, светом духа просветихомся, и прелести якоже тьмы изменихомся, и чувственных и огненных язык раздаянием, и преестественным действом, еже в Тя веры научихомся, и Тебе благословити со Отцем и Святым Духом, во едином Божестве, и силе, и власти узарихомся.
Ты убо Очее сияние, существа и естества его неизменное и недвижимое начертание, источниче премудрости и благодати: отверзи и мне грешному устне, и научи мя, како достоит, и о ихже потреба молитися: Ты бо еси ведый многое грехов моих множество, но Твое благоутробие победит сих безмерное.
Се бо страхом предстою Ти, в пучину милости Твоея отчаяние души моея поверг: окорми живот мой словом всю тварь неизреченною премудрости силою управляяй, тихое обуреваемых пристанище, и скажи ми путь, воньже пойду.
Дух премудрости Твоея моим подаждь помышлением, дух разума безумию моему даруяй, духом страха Твоего моя осени дела, и дух правый обнови в утробе моей, и духом владычним мыслей моих поползновение утверди:
да на всяк день Духом Твоим благим к полезному наставляемь, сподоблюся творити заповеди Твоя, и Твое присно памятствовати славное пришествие, и истязательное содеянных нами.
И да не презриши мя тленными сопрельщатися мира сего красными, но будущих восприятия желати укрепи сокровищ.
Ты бо рекл еси Владыко: яко елика аще кто просит о Твоем имени, невозбранно приемлет от Твоего присносущнаго Бога и Отца, темже и аз грешный в пришествии святаго Твоего Духа, Твою молю благость, елика просих, воздаждь ми во спасение.
Ей Господи, всякаго благодеяния богатый дателю, и подателю благий, яко Ты еси подаваяй преизобильно ихже просим: Ты еси сострадателен и милостивый, иже безгрешно быв плоти нашея общник, и приклоняющым к Тебе колена, приклоняяйся любоблагоутробне, очищение же быв грехов наших.
Даждь убо Господи, людем Твоим щедроты Твоя: услыши нас с небесе святаго Твоего: освети нас силою спасительныя десницы Твоея: покрый нас кровом крилу Твоею, да не призриши дел руку Твоею.
Тебе единому согрешаем, но и Тебе единому служим. Не вемы кланятися Богу чуждему, ниже простирати руки наша Владыко, к Богу иному.
Остави нам согрешения, и приим наша коленопоклонная моления, простри всем нам руку помощи, приими молитву всех яко кадило приятное, восприемлемое пред Твоим преблагим царством.
К второй молитве присоединяется еще эта:
Господи, Господи, избавлей нас от всякия стрелы летящия во дни: Избави нас от всякия вещи во тьме преходящия: Приими жертву вечернюю рук наших воздеяния.
Сподоби же нас и нощное поприще без порока прейти неискушены от злых: И избави нас от всякаго смущения и боязни, яже от диавола нам прибывающия.
Даруй душам нашим умиление, и помыслом нашим попечение, еже на страшнем праведнем Твоем суде испытания.
Пригвозди страху Твоему плоти нашя, и умертви уды наша сущыя на земли: Да и сонным безмолвием просветимся, зрением судеб Твоих.
Отими же от нас всякое мечтание неподобное и похоть вредну. Возстави же нас во время молитвы утверждены в вере и преспевающыя в заповедех Твоих.
Третья молитва
Приснотекущий, животный, и просветительный источниче, соприсносущная Отцу содетельная сило, все смотрение за спасение человеческое прекрасне исполнивый, Христе Боже наш, смерти узы неразрешимыя, и заклепы адовы расторгнувый, лукавых же духов множество поправый.
Приведый себе о нас непорочное заколение, и тело давый пречистое в жертву, всякого греха неприкосновенное же и непроходное, и страшным сим, и неисповедимым священнодействием живот нам вечный даровавый: во ад сшедый, и вереи вечныя сокрушивый, и во тьме седящым восход показавый:
начало злобнаго же и глубиннаго змия Богомудростным льщением уловивый и веригами мрака связавый в тартаре и огни негасимом, и во тьме кромешней неисчетно сильною Твоею затвердивый крепостию, великоименитая премудросте Отчая, напаствуемым великий помощник явивыйся, и просветивый седящыя во тьме и сени смертней.
Ты славы присносущныя Господи, и Отца вышняго Сыне возлюбленный, присносущный свете от присносущнаго света, солнце правды, услыши нас молящихся к Тебе, и упокой душы рабов Твоих, прежде усопших отец и братий наших, и прочих сродник по плоти, и всех своих в вере, о нихже и память творим ныне, яко в Тебе всех держава, и в руце Твоей содержи вся концы земли.
Владыко вседержителю, Боже Отец и Господи милости, рода смертнаго же и безсмертнаго, и всякаго естества человеческаго содетелю, составляемаго же, и паки разрешимаго, живота же и скончания, еже зде пребывания, и еже тамо преложения: лета измеряяй живым, и времена оставляяй смерти: низводяй во ад и возводяй: связуяй в немощи, отпущаяй в силе: настоящая потребне строяй, и будущая полезно управляяй: смертным жалом уязвенных воскресения надеждами веселяяй.
Сам убо Владыко всех, Боже Спасителю наш, надежде всех концев земли, и сущих в море далече, иже в сей последний и великий спасительный день пятдесятницы праздника, тайну святыя и единосущныя, и соприсносущныя, и неразделимыя, и неслиянныя Троицы показавый нам, и наитие и пришествие святаго и животворящаго Твоего Духа, в виде огненных языков на святыя Твоя апостолы излиявый и благовестники тех поставивый, благочестивыя нашея веры, и исповедники истиннаго богословия показавый:
Иже и в сей всесовершенный и спасительный праздник, очищения убо молитвенная, о иже во аде держимых сподобивый приимати, великия же подаваяй нам надежды ослабления содержимым от содержащих я скверн, и утешению Тобою низпослатися.
Услыши нас смиренных, и Твоих раб молящихся Ти, и упокой душы Рабов Твоих прежде усопших, на месте светле, на месте злачне, на месте прохлаждения: Отонудуже отбеже всякая болезнь, печаль и воздыхание и учини духи их в селениях праведных, и мира и ослабления сподоби их:
яко не мертвии восхвалят Тя Господи, ниже сущии во аде исповедание дерзнут принести Тебе: но мы живии благословим Тя и молим, и очистительныя молитвы и жертвы приносим Тебе о душах их.
К третьей молитве присоединяется еще эта:
Боже великий, и вечный, святый, человеколюбивый, сподобивый нас в сей час стати пред неприступною Твоею славою, на пение и хвалу чудес Твоих, очисти ны недостойныя рабы Твоя, и подаждь благодать еже сокрушенным сердцем, невозносительно приносити Тебе трисвятое славословие, и благодарение великих Твоих даров, яже сотворил еси к нам, и твориши всегда в нас.
Помяни Господи немощь нашу, и да не погубиши нас со беззаконии нашими: но сотвори великую милость со смирением нашим, да греховныя тьмы избежавше, во дни правды ходити будем, и одеявшеся оружием света, ненаветно пребудем от всякия козни лукаваго, и со дерзновением прославим о всех, Тебе единаго истиннаго человеколюбца Бога.
Твое во яко воистину и великое вресноту таинство, Владыко всех, и Творче, временное решение Твоих тварей, и еже по сих совокупление, и упокоение еже во веки:
Тебе благодать о всех исповедуем, о входех наших, яже в мир сей, и исходех, надежды нам воскресения, и жизни нетленныя, Твоим неложным обещанием предобручают, яже приимем в будущем втором пришествии Твоем.
Ты бо еси и воскресения нашего начальник, и поживших неумытный человеколюбивый судия, и мздовоздаяния Владыка и Господь, иже и приобщивыйся нам приискренно плоти и крове, снизхождения ради крайняго:
и нашя страсти неотметныя, внегда волею во искус поставити, приим за милосердие щедрот, и в немже пострадал еси сам искусився, искушаемым нам быв самообещанный помощник: темже и совозвел еси нас в Твое безстрастие.
Приими убо Владыко, мольбы и моления наша, и упокой вся Отцы коегождо, и матери, и чада, и братию, и сестры единородныя, и купнородныя, и вся прежде почившыя душы: в надежде воскресения жизни вечныя учини духи их, и имена в книзе животней, в недрах Авраама, и Исаака, и Иакова, в стране живых, в царствии небеснем, в раи сладости, светлыми ангелы Твоими, вводя вся во святыя Твоя обители, совоздвизаяй и телеса наша в день, воньже определил еси по святым Твоим и неложным обетованием.
Несть убо Господи, рабом Твоим смерть, исходящым нам от тела, и к Тебе Богу нашему приходящым, но преставление от печальнейших на полезнейшая и сладостнейшая, и на упокоение и радость.
Аще же и что согрешихом к Тебе, милостив буди нам же и тем, зане ни един есть чист пред Тобою от скверн, ниже аще един день живота его есть, разве Ты точию един, на земли явивыйся безгрешный Господь наш Иисус Христос: имже вси уповаем милость получити, и оставление грехов.
Сего ради нам же и онем, яко благ и человеколюбец Бог, ослаби, остави, прости грехопадения наша, вольная и невольная, яже в ведении, предявленная и забываемая: яже в деянии, яже в помышлении, яже в словеси, яже во всех наших житиях и движениих.
И отшедшым убо свободу и ослабу даруй, нас же сущих зде благослови, конец благий и мирный даруя нам же и всем людем Твоим, и милости и человеколюбия утробу отверзаяй нам, на страшном и ужасном Твоем пришествии, и царствия Твоего достойных нас сотвори.
К третьей молитве присоединяется еще одна:
Боже великий и вышний, едине имеяй безсмертие, во свете живый неприступном, всю тварь мудростию создавый, разделивый посреде света, и посреде тьмы: И солнце убо положивый во область дне, луну же и звезды во область нощи.
Сподобивый нас грешных и в настоящий день предварити лице Твое во исповедании, и вечернюю Тебе службу принести.
Сам человеколюбче Господи, исправи молитву нашу, яко кадило пред Тобою, и приими ю в воню благоухания.
Подаждь же нам настоящий вечер и проходящую нощь мирну: облецы ны оружием света, избави нас от страха нощнаго, и от всякия вещи во тьме преходящия.
И даруй нам сон, иже во упокоение немощи нашей даровал еси, от всякого диавольскаго мечтания изменен.
Ей Владыко всех благих подателю, яко да и на ложах наших умиляющеся воспомянем и в нощи пресвятое имя Твое.
И поучением Твоим заповедей озаряеми, в радости душевной востанем к славословию Твоея благости, молитвы и моления Твоему благоутробию приносяще о своих гресех, и о всех людех Твоих: ихже молитвами Пресвятыя Богородицы, в милости посети.
Статья опубликована участником [tol] 2012-05-30. Со временем любая информация устаревает. Если Вы нашли ошибки или устаревшие сведения в этой статье, сообщите об этом.
В основной раздел 'Икона Господа Троица Ветхозаветная (Гостеприимство Авраама)'.