Меню сайта

Начальная страница
Иконы Богородицы
Иконы Иисуса Христа
Иконы Ангелов
Иконы Святых
Минейные иконы
Модерация
Опознание икон
Новое на сайте
Оффлайн-каталог
Аудиозаписи канонов
О проекте / конт@кт
Помочь сайту
Форум

Пользователь

Работаем анонимно.
Вход | Регистрация

Акафист преподобной Евтропии Херсонской

Икона Евтропия Херсонская, прп.
Эта страничка относится к разделу

s   Евтропия Херсонская, прп.


Тропарь, глас 4
Добродетельми богатая, / кротостию и благочестием украшенная,/ возсияла еси чистотою жития твоего:/ и ныне в Небеснем чертозе/ с мудрыми девами предстоящи Христу,/ моли о нас, мати Евтропие,/ почитающих память твою.
Кондак, глас 3
Монашеское житие от юности возлюбивши,/ и во след Христа усердно потекши,/ постническими подвиги, бдением и молитвами/ страсти греховныя укротила еси,/ и наставница многим к житию благочестному в земли Херсонстей явилася еси./ Темже всечестную твою память совершающе,/ благодарными гласы, веселящеся, вопием ти:/ Радуйся, мати наша, Евтропие преподобная.
Кондак 1
Избранней и предивней угоднице Христовой, / скорой помощнице и молитвеннице нашей,/ преподобней матери Евтропии,/ похвальная воспеваем пения./ Ты же, предстательнице наша,/ яко имущая велие дерзновение ко Господу,/ моли избавитися нам от бед и скорбей, зовущим:/ Радуйся, преподобная мати Евтропие, о душах наших усердная молитвеннице.
Икос 1
Ангельски на земли поживши, постническим житием Христу угодила еси, преподобная мати, и, по скончании земнаго жительства, радости небесныя причаститися сподобилася еси. Темже с горних высот призри на ны, тако тя величающия:
Радуйся, голубице непорочная.
Радуйся, девственнице чистая.
Радуйся, иночествующим утешение.
Радуйся, к Небесным обителем путеводительнице.
Радуйся, притекающих к тебе заступнице.
Радуйся, теплая за ны ходатаице.
Радуйся, преподобная мати Евтропие, о душах наших усердная молитвеннице.
Кондак 2
Видя Господь ангелоподобное житие твое, мати Евтропие, и яко имаши святое имя Его прославити добретельми: воздержанием, молитвою, милостынею, чистотою, любовию же и смиренномудрием, от юности твоея призва тя пети Ему: Аллилуиа.
Икос 2
Разум небесный тебе даровася, преподобная, сего ради, Христови всю себе вручивши, непрестанно помышляла еси о небесных в богоспасаемей обители Алешковстей. Мы же, ведуще о сем, приносим ти похвалы сия:
Радуйся, благочестию и молитве измлада наученная.
Радуйся, чтению Божественных Писаний навыкшая.
Радуйся, жития святых и поучения их возлюбившая.
Радуйся, от юности твоея страх Божий имевшая.
Радуйся, во всем житии твоем о горнем помышлявшая.
Радуйся, сим путь спасения нам показавшая.
Радуйся, преподобная мати Евтропие, о душах наших усердная молитвеннице.
Кондак 3
Сила Вышняго от юности твоея воистину осеняше тя, святая Евтропие, храняше бо тя и возбуждаше на молитву, пощение и милосердие. Темже вся сия исполнивши, Небесному Царю и Владыце всех угодила еси, и ныне, пресветлым небесным венцем украсившися, воспеваеши со Ангелы песнь: Аллилуиа.
Икос 3
Имеяше желание благое мир оставити и единому Господеви поработати, стопы твоя во обитель Алешковскую направила еси, да возможеши безпреткновенно подвигам иноческим предатися и житию святых поревновати. Мы же, взирая на сие, прославляем Бога, укрепляющаго верныя Своя, приносяще тебе таковая:
Радуйся, точию Господу угодити восхотевшая.
Радуйся, со умилением Ему молившаяся.
Радуйся, Бога яко Отца измлада возлюбившая.
Радуйся, в напастех на Того Единаго уповавшая.
Радуйся,чистоты душевныя и телесныя хранительнице.
Радуйся, дев благочестивых украшение.
Радуйся, преподобная мати Евтропие, о душах наших усердная молитвеннице.
Кондак 4
Бури страстей желающи избежати, житие девственное возлюбила еси, преподобная, и, ум и сердце отрешивши от всего земнаго и привременнаго, к Горнему Иерусалиму устремилася еси, да возможеши непрестанно взывати Христу: Аллилуиа.
Икос 4
Слышала еси, преподобная мати, яже Апостол рече: «Непосягшая печется о Господних, како угодити Господеви», - сему поревновала еси. Темже, ведуще богоугодное житие твое и теплую любовь к Богу, вопием ти сицевая:
Радуйся, приметатися во дворех Господних возлюбившая.
Радуйся, путь иноческаго жития избравшая.
Радуйся, Христу уневещенная.
Радуйся, свеще негасимая, к Богу в молитвах горящая.
Радуйся, благодатию Божиею обогащенная.
Радуйся, едину надежду токмо на Господа полагавшая.
Радуйся, преподобная мати Евтропие, о душах наших усердная молитвеннице.
Кондак 5
Боготечная звезда, ко истине Христовой путеводящая, явилася еси, блаженная мати, егда бурю лютых гонений на Церковь воздвиже враг рода человеческаго. Ты же всем приходящим к тебе молитвенную помощь подавала еси, увещавающи верность Христу хранити и за вся Бога благодарити, с любовию поюще Ему: Аллилуиа.
Икос 5
Слышавше ближнии и дальнии о благочестии твоем, притекаху к тебе в болезнех и скорбех, бедах и нуждах, яко к добрей наставнице. Ты же, мати Евтропие, утешающи всех, назидала еси наипаче заповеди Господни соблюдати и любовь ко всем в сердцах своих имети. Мы же, прославляюще мудрость и смирение твое, умиленным сердцем воспеваем ти таковая:
Радуйся, праведнице, от Бога нам дарованная
Радуйся, к Немуже велие дерзновение стяжавшая.
Радуйся, заблуждений и недоумений наших добрая вразумительнице.
Радуйся, недугов всяческих и скорбех наших прогонительнице.
Радуйся, по морю житейскому нас путеводящая.
Радуйся, путь смирения во спасение нам указующая.
Радуйся, преподобная мати Евтропие, о душах наших усердная молитвеннице.
Кондак 6
Проповедуют о богоугоднем житии твоем, блаженная мати, добродетели твоя: благочестие, смиренномудрие, милосердие и истинная любовь ко всем. Ты бо, по слову Апостола: «Всяк же подвизаяйся от всех воздержится», в посте и воздержании неослабно пожила еси, дары Духа Святаго в сердце своем стяжавая и выну Господеви поя: Аллилуиа.
Икос 6
Возсия Божественная благодать в подвизех жития твоего, мати Евтропие, еюже укрепленная, по разорении обители Алешковския в весь Киндийскую преселившися, душу свою молитвою во храме Рождества Пресвятыя Богородицы питала еси. Мы же, богоугодное житие твое ведуще, поем тебе сицевая:
Радуйся, Крест Христов аки знамение веры приимшая.
Радуйся, скорби и лишения со смирением понесшая.
Радуйся, во храме, аки при ногу Христову, приметатися изволившая.
Радуйся, яко не посрами тя Господь во уповании на Него.
Радуйся, покаянию и заповедем Божиим нас научающая.
Радуйся, прославляти и благодарити Господа за вся нас вразумляющая.
Радуйся, преподобная мати Евтропие, о душах наших усердная молитвеннице.
Кондак 7
Хотяй Человеколюбец Господь всем спастися и в разум истины приити, яви тебе, преподобная Евтропие, подвижницу веры и благочестия в земли Херсонстей, да известно уведевшии о святем житии твоем прославят Бога, дивнаго во святых Своих, присно вопиюще Ему: Аллилуиа.
Икос 7
Новую и дивную дарова Господь людем херсонским молитвенницу и целительницу недугов душевных и телесных, подвизая всех угоднице Своей, блаженней старице Евтропии, воспевати сице:
Радуйся, спасения нашего к Богу ходатаице.
Радуйся, о прощении грехов наших Судии Праведнаго умилостивительнице.
Радуйся, благое иго Христово на ся вземшая.
Радуйся, бремя Его с радостию понесшая.
Радуйся, к ближним милости и сострадания преисполненная.
Радуйся, смиренною молитвою вся побеждавшая.
Радуйся, преподобная мати Евтропие, о душах наших усердная молитвеннице.
Кондак 8
Странно бысть неверующим слышати, како возмогла еси невидимое зрети яко видимое и грядущая провидети яко настоящая, не ведяху бо силы Божия, в немощи человечестей совершаемыя, ниже пети Создателю всяческих: Аллилуиа.
Икос 8
Вся земныя утехи, яко скорогибнущия, во уметы вменила еси, преподобная мати Евтропие, ум и сердце твое в горняя вперивши. Сего ради яви тя Господь людем херсонским посреде бурь житейских миром их ограждающую и кроткими словесы твоими на путь спасительный, ведущий к Царствию Небесному, наставляющую. Мы же, прославляя Бога, тако тя укрепившаго, приносим ти благохваления таковая:
Радуйся, во вся дни приходящим к тебе духовную помощь подававшая.
Радуйся, бодрствующи духом, вся нощи в молитве проводившая.
Радуйся, псаломски утро в молениих предварявшая.
Радуйся, вериги тяжкия на теле своем нося, плоть свою всячески смирявшая.
Радуйся, постом, молитвою и благодатиею Божиею дух твой подкреплявшая.
Радуйся, в женстем естестве мужескую крепость имевшая.
Радуйся, преподобная мати Евтропие, о душах наших усердная молитвеннице.
Кондак 9
Во всяких напастех и скорбех была еси утешительницею благодатною, мати Евтропие, тугу сердечную страждущих словесы и молитвами твоими прогоняя, и во уповании на помощь Вышняго тех укрепляя, и научая пети Ему: Аллилуиа.
Икос 9
Ветии многовещанныя не возмогут по достоянию восхвалити ангельское твое житие и премногия добродетели, преподобная мати, имиже просвещаеши вся и наставляеши на путь спасения. Того ради, во свете святых ныне пребывающи, поминай творящия память твою песньми сицевыми:
Радуйся, сущим в бедах скорая помощнице.
Радуйся, обидимых крепкая защитнице.
Радуйся, обидящих строгая наказательнице.
Радуйся, сумнящихся кроткая вразумительнице.
Радуйся, душ смятенных умиротворительнице тихая.
Радуйся, недоумеющим советнице мудрая.
Радуйся, преподобная мати Евтропие, о душах наших усердная молитвеннице.
Кондак 10
Спасти хотя многия люди от страданий телесных и недугов душевных, вся нощи без сна в молитве коленопреклоненно пред Почаевскою иконою Божия Матери проводила еси, праведнице Божия, помощи у Царицы Небесныя прося и поющи Сыну Ея ангельскую песнь: Аллилуиа.
Икос 10
Стена еси непоколебима, мати Евтропие, всем в нуждах и скорбех к тебе прибегающим. Темже, припадающе, молимся: услыши ныне и нас, скорбьми, болезньми и многими печальми обдержимых, и потщися на помощь к нам, умилостивляющи благоутробнаго Господа о всех, к тебе вопиющих:
Радуйся, усердная о нас, грешных, к Богу предстательнице.
Радуйся, всех прибегающих к тебе благая утешительнице.
Радуйся, молитвою твоею спастися нам помогающая.
Радуйся, мысли благия в недоумениях наших на сердце нам полагающая.
Радуйся, враждующих благое примирение.
Радуйся, от брани единокровных охранение.
Радуйся, преподобная мати Евтропие, о душах наших усердная молитвеннице.
Кондак 11
Пение Пресвятей Троице непрестанно возносила еси, преподобная мати, и всем житием твоим подвижница благочестия прозорливая и преизрядная явилася еси. Научи и нас, недостойных, како подобает достойно славословити Бога, в Троице покланяемаго, Отца и Сына и Святаго Духа, Емуже непрестанно на небеси Воинства Небесная велегласно поют: Аллилуиа.
Икос 11
Светоподательным светильником явилася еси, Евтропие блаженная, всем к тебе приходящим: монашествующим была еси наставница изрядная, благочестно живущим – опора крепкая, во тьме грехов погрязшим, заблуждшим и от пути истиннаго отклонившимся – вразумление кроткое. Мы же, разумеюще любовь твою велию ко всем, ублажаем тя тако:
Радуйся, преподобных сподвижнице.
Радуйся, праведных сопричастнице.
Радуйся, землю Херсонскую молитвою твоею облагоухавшая.
Радуйся, яко пчела цвет добродетелей мудро взыскавшая.
Радуйся, дар прозорливости стяжавшая.
Радуйся, милостиво свыше на нас призирающая.
Радуйся, преподобная мати Евтропие, о душах наших усердная молитвеннице.
Кондак 12
Благодати и благих дел исполнена, течение земное совершивши, в мире преставилася еси, преподобная мати, от земных к небесным, идеже Владыце, веселящися, предстоиши и за нас непрестанно молитвы Ему возносиши, прославляя Его ангельскою песнию: Аллилуиа.
Икос 12
Поюще праведное твое житие, ублажаем тя, преподобная мати Евтропие, и, припадая ко святым и многоцелебным мощем твоим, молимся: буди нам во всем ко благу скорая помощница, зовущим ти таковая:
Радуйся, яко на небесех ныне пред Господем предстоиши.
Радуйся, яко о людех пред Богом выну предстательствуеши.
Радуйся, земли Херсонския крепкое ограждение.
Радуйся, Святыя Церкви благолепное украшение.
Радуйся, о иночествующих тепле молящаяся.
Радуйся, о благе в миру живущих Бога просящая.
Радуйся, преподобная мати Евтропие, о душах наших усердная молитвеннице.
Кондак 13
О всехвальная угоднице Божия, преподобная мати Евтропие! Приими сие малое моление наше, в похвалу тебе возносимое, и твоим теплым предстательством испроси нам у Царя Славы: в немощех исцеление, в добродетелех преспеяние, от врагов видимых и невидимых избавление, от вечныя муки свобождение и Царства Небеснаго наследие, да со Ангелы и всеми святыми присно поем Спасителю нашему: Аллилуиа.
(Этот кондак читается трижды, затем икос 1 и кондак 1).
Молитва
О преподобная мати Евтропие, великая подвижнице и всехвальная угоднице Христова! Приими моление нас, недостойных, с верою и любовию к тебе припадающих, и испроси у Великодаровитаго Христа Бога нашего земли Херсонстей и людем ея мир и благоустроение; на ниве Божией подвизающимся исходатайствуй у Господа нашего, да выну пребывают тщанием не лениви, духом горяще, Ему неленостно работающе и в молитвах неусыпающе; в мире благочестно живущим испроси в вере твердость и во благочестии постоянство; и всем, с верою прибегающим к тебе и твоея помощи и заступления просящим, подавай присно недугов исцеление, в скорбех утешение, во всем житии благопоспешение; наипаче же Господа умоли в мире и покаянии земное житие нам преити, мытарств горьких и мук вечных избавитися, и Царство Небесное наследовати, идеже ты со всеми святыми Господу предстоиши, да выну славим Отца и Сына и Святаго Духа, ныне и в безконечныя веки. Аминь.

Источник: Сайт www.pravoslavie.ks.ua [2013-09-20]

Статья опубликована участником [otcgnd] 2014-02-11, последний раз редактировалась участником [otcgnd] 2014-02-11. Со временем любая информация устаревает. Если Вы нашли ошибки или устаревшие сведения в этой статье, сообщите об этом.

В основной раздел 'Евтропия Херсонская, прп.'.