АКАФИСТ ПРЕПОДОБНОМУ ОТЦУ НАШЕМУ ФЕОФАНУ (РЫХЛОВСКОМУ)
 |
|
Кондак 1
Избранному верному рабу Христову и пастырю доброму, старцу смиренному и милосердному, преподобному отцу нашему Феофану, подвиг многотруднаго жития богоугодно совершившему, и в обители Отца Небеснаго достойно вшедшему, умиленное с похвалами радостное приносим пение: ты же, яко имеяй велие дерзновение ко Господу, поминай нас, недостойных чад твоих, любовию зовущих:
Радуйся, преподобне отче Феофане, молитвенниче наш любвеобильный.
Икос 1
Ангельскому житию от юности ревнуя, отче Феофане, во обитель Рыхловскую святителя Николая вселился еси, идеже страх Божий стяжав, в подвизех иноческаго послушания усердно подвизаяся, ангел во плоти явился еси. Сего ради вопием ти:
Радуйся, Бога Отца рабе верный и смиренный;
радуйся, Сына Божия воине добропобедный.
Радуйся, Духа Святаго сосуде избранный;
радуйся, непорочность и чистоту стяжавый.
Радуйся, Святителя Николая любимиче;
радуйся, обители его достойный насельниче.
Радуйся, райскаго блаженства наследниче;
радуйся, ангельских ликов собеседниче.
Радуйся, преподобне отче Феофане, молитвенниче наш любвеобильный.
Кондак 2
Видев усердие твое, святе Феофане, в подвизех иноческих, Господь избра тя, яко вернаго раба Своего, и, ради укрепления в вере и благочестии, болезнями посеща тя, подавая послежде исцеления, да возрастаеши в мужа совершенна, поя Богу: Аллилуиа.
Икос 2
Разум богопросвещен стяжав и в трудех добродетельных преуспевая, сподобился еси слышати таинственный глас, во иноки тя призывающий. Мы же богоугодному житию твоему дивящеся и последовати ему тщащеся, со умилением зовем:
Радуйся, веру, надежду и любовь стяжавый;
радуйся, Христа паче всех благ возлюбивый.
Радуйся, братии монастырской с любовию послуживый;
радуйся, благое иго Христово усердно понесый.
Радуйся, в болезнех воле Божией себе вручавый;
радуйся, исцеления верою от Господа получавый.
Радуйся, образе кротости и смирения;
радуйся, учителю целомудрия и терпения.
Радуйся, преподобне отче Феофане, молитвенниче наш любвеобильный.
Кондак 3
Сила благодатная Нерукотвореннаго Образа Христа Спасителя многажды спасаше и исцеляше тя, старче Феофане, сего ради в годину лютую Образ сей спасл еси, пред ним же до конца дней твоих усердно воспевал еси Христу Богу: Аллилуиа.
Икос 3
Имея любовь велию к Матери Господа, богомудре Феофане, чистоте, смирению и терпению Ея подражая, посещения Царицы Небесныя сподобился еси, за еже ублажаем тя тако:
Радуйся, по Христе Спасе Матерь Его возлюбивый;
радуйся, житием преподобным Ей угодивый.
Радуйся, все упование на Заступницу усердную возлагавый;
радуйся, в молитвах прилежно пред Ней предстоявый.
Радуйся, посещения Матери Света удостоивыйся;
радуйся, многажды Ея заступления сподобивыйся.
Радуйся, Еяже лицезрения ныне наслаждаешися;
радуйся, Еяже покровом и мы покаяния ради сохраняемся.
Радуйся, преподобне отче Феофане, молитвенниче наш любвеобильный.
Кондак 4
Буря неистовых гонений постиже корабль Церкви Христовы, обитель Рыхловская поруганию предадеся, иноцы изгнани быша; тогда и ты, отче преподобне, со инеми в зимний мраз гоним был еси, воспевая Подвигоположнику Христу: Аллилуиа.
Икос 4
Слышав глагол Христов, яко в мире скорбни будете, и яко возложат на вы руки и ижденут, и будете ненавидими от всех имене Моего ради, ты в руце Божии себе предал еси, терпением спасая душу свою. Сего ради умильно зовем ти:
Радуйся, изгнание Христа ради претерпевый;
радуйся, поношения смиренно подъявый.
Радуйся, за Истину люто гонимый;
радуйся, всяк зол глагол кротце сносивый.
Радуйся, веры Христовы твердый исповедниче;
радуйся, терпения в скорбех проповедниче.
Радуйся, от любве Христовы не разлучивыйся;
радуйся, блаженства райскаго причастивыйся.
Радуйся, преподобне отче Феофане, молитвенниче наш любвеобильный.
Кондак 5
Боготечная звезда – Христов Святитель Николай во сне явися тебе, всеблаженне Феофане, со Святителем Феодосием и преподобным Серафимом, пред Царем Господем в беседе возлюбленным своим нарече тя и в храме во имя свое восхоте имети тя, да тамо поеши Богу: Аллилуиа.
Икос 5
Видя новыя скорби в закрытии святых храмов, ты, отче Феофане, по весям странствуя, ближним трудами служил еси, тайно чад своих духовных окормляя. Таже четырежды яко узник увозим был еси, и в реце зимою потопляем, от всех бед чудесно Господем спасаем был еси. Мы же на сих путех припадающе к тебе, зовем:
Радуйся, Святителем Николаем возлюбленный;
радуйся, Святителем Феодосием возжеленный.
Радуйся, преподобному Серафиму уподобивыйся;
радуйся, с преподобным преподобен явивыйся.
Радуйся, чрез огнь скорбей и воду бед прошедый;
радуйся, в покой вечный радостно вшедый.
Радуйся, Господем неврежден в напастех пребывый;
радуйся, мучениче безкровный и долготерпеливый.
Радуйся, преподобне отче Феофане, молитвенниче наш любвеобильный.
Кондак 6
Проповедник Истины словом и житием явился еси, преподобне Феофане, егда бо храмы Божии открывахуся, тогда службы Господеви совершая, верных ко спасению наставлял еси, даром прозорливости и благодатныя помощи приходящих утешая и непрестанно поя Богови: Аллилуиа.
Икос 6
Возсиял еси на свещнице церковнем богоугодным житием, пастырю наш добрый, постом, молитвами, воздержанием плоть свою умерщвляя и духови покоряя, образ верным в слове, в любви, в вере, во всем житии твоем был еси. Сего ради приими от нас похвалы сия:
Радуйся, блаженне, яко непорочен пред Богом ходил еси;
радуйся, яко многи плоды духовныя в себе возрастил еси.
Радуйся, олтаря Господня верный служителю;
радуйся, Божественныя литургии благоговейный совершителю.
Радуйся, преподобным Лаврентием ангелом нареченный;
радуйся, во Царствии Небеснем ему сопричтенный.
Радуйся, скорби и радости с ним разделявый;
радуйся, Свет невечерний в себе стяжавый.
Радуйся, преподобне отче Феофане, молитвенниче наш любвеобильный.
Кондак 7
Хотя Владыка Христос образ смирения и терпения нам тобою явити, отче преподобне, попусти скорбями многими тя испытати, да яко злато в горниле очистишися, и нас терпением и смирением научиши побеждати вся искушения и благодарно воспевати Победителю Христу: Аллилуиа.
Икос 7
Новое чудо яви Господь чрез Архистратига Михаила, иже весною на дивней колеснице везе тя, достохвальне Феофане, верху воды и леда на иный брег Десны. Сему дивящеся, воспеваем ти тако:
Радуйся, Архистратига воинств небесных лицезревый;
радуйся, со безплотным яко ангел беседовавый.
Радуйся, Начальником вышних сил на колеснице возимый;
радуйся, служения ангельскаго достоин бывый.
Радуйся, святость еще в житии стяжавый;
радуйся, преподобием в подвиге просиявый.
Радуйся, на вечери Христовой друже избранный;
радуйся, помощниче крепкий, Богом нам данный.
Радуйся, преподобне отче Феофане, молитвенниче наш любвеобильный.
Кондак 8
Странствие земное богоугодно совершив, старче преподобне Феофане, изгнания, лишения, беды и скорби многи претерпевал еси, Подвигоположнику Христу подражая и язвы Господа на теле своем нося, выну воспевал еси Ему: Аллилуиа.
Икос 8
Весь был еси любовь неоскудевающая, отче преподобне, всем радость даровал еси, скорбящих утешая, недужных врачуя, от бед избавляя, паству свою в вере православней сохраняя. О сем духовная чада твоя с любовию возглашают:
Радуйся, в беде сущим скорый помощниче;
радуйся, скорбящих и обидимых заступниче.
Радуйся, недугов душевных и телесных целителю;
радуйся, пред Богом теплый наш предстателю.
Радуйся, ближних возлюбивый и всем вся бывый;
радуйся, столпе Православия непоколебимый.
Радуйся, стадо словесное от волков сохраняяй;
радуйся, любовию своею присно нас согреваяй.
Радуйся, преподобне отче Феофане, молитвенниче наш любвеобильный.
Кондак 9
Всех мучеников на небеси посетил еси пред блаженною кончиною твоею, дивный отче Феофане, достигнув старости глубокия, с ними же в обители Отца Небеснаго вселился еси, прешед от смерти в живот вечный, идеже со всеми святыми поеши Богу: Аллилуиа.
Икос 9
Ветия многовещанныя дивных дел твоих, отче всеблаженне, якоже в житии, тако и по отшествии твоем, явишася вси приходящии к тебе с верою, имже, яко отец чадолюбивый, помощь подаеши. Сего ради благодарни суще, радостная зовем ти:
Радуйся, благочестно течение жизни твоея скончавый;
радуйся, дух твой в руце Господа предавый.
Радуйся, по отшествии твоем нас не оставляющий;
радуйся, мощами святыми с нами пребывающий.
Радуйся, прошения наша с любовию приемлющий;
радуйся, пред Господем о нас ходатайствующий.
Радуйся, пастырем образе благодатный;
радуйся, пасомым утешителю всехвальный.
Радуйся, преподобне отче Феофане, молитвенниче наш любвеобильный.
Кондак 10
Спасение вечное унаследовал еси, блаженне Феофане, и о спасении нашем Господа умоляеши, да в покаянии и в житии по вере житейское море преплывше, достигнем тихаго пристанища, идеже несть болезнь, ни печаль, ни воздыхание, но вечная песнь: Аллилуиа.
Икос 10
Стена и покров еси всем с верою притекающим к тебе, отче чадолюбивый, сего ради молим тя: стеною молитв твоих и покровом любви твоея сохраняй нас от всех бед и напастей, от враг видимых и невидимых, да зовем ти усердно:
Радуйся, Пасхи священнейшей на небеси причащающийся;
радуйся, славы присносущныя наслаждающийся.
Радуйся, пастырю добрый Христова стада;
радуйся, в бедах сущим стена и ограда.
Радуйся, вдовиц и сирот отец чадолюбивый;
радуйся, скорый заступниче обидимых и гонимых.
Радуйся, яко предстательством твоим от бед сохраняемся;
радуйся, яко молитвами твоими жизни вечныя сподобляемся.
Радуйся, преподобне отче Феофане, молитвенниче наш любвеобильный.
Кондак 11
Пение молитвенное умом, сердцем и всем житием твоим, яко фимиам благовонный, Господеви возносил еси, дивный отче Феофане, сего ради пения ангельскаго во славе вечней сподобился еси, воспевая с мудрыми девами Жениху душ наших: Аллилуиа.
Икос 11
Светильник неугасимый во мраце жития сущим был еси, святе Феофане, светом веры Христовы всех просвещая и на путь спасительный наставляя. Ныне же яко солнце просветился еси в невечернем дни Царствия Небеснаго, к Солнцу правды призывая и нас, взывающих ти:
Радуйся, свеще присногорящая Христова света;
радуйся, благовестниче нескончаемаго лета.
Радуйся, смирением на высоту небесную возвысивыйся;
радуйся, терпеним и кротостию украсивыйся.
Радуйся, яко любити ближних в делах милосердия научаеши;
радуйся, яко молитися за обидящих и ненавидящих наставляеши.
Радуйся, на земли николиже никогоже осудивый;
радуйся, истинный образ жития по вере явивый.
Радуйся, преподобне отче Феофане, молитвенниче наш любвеобильный.
Кондак 12
Благодати Божия сосуд избран был еси, благоухая богоугодным житием твоим, отче наш вселюбимый, дара сея благодати и мы получити от Господа молитвами твоими чаем, да еюже спасаеми, умиленно с тобою поем Богу: Аллилуиа.
Икос 12
Поюще Бога, дивнаго во Святых Своих, ублажаем тя, достохвальне отче Феофане, тобою бо Господь прославляется, вера православная утверждается, вернии надеждою на спасение окриляются, любовь к Богу и ближним возгревается, сего ради поем тебе:
Радуйся, Бога вездесущаго пред собою выну предзревый;
радуйся, любовь крепкую к Нему имевый.
Радуйся, Христу в скорбех сораспявыйся;
радуйся, всем сердцем к Нему прилепивыйся.
Радуйся, Духом Святым в жизни водимый;
радуйся, Его избранным сосудом бывый.
Радуйся, земли нашея славо и украшение;
радуйся, верным сокровище и ограждение.
Радуйся, преподобне отче Феофане, молитвенниче наш любвеобильный.
Кондак 13
О богоблаженне отче наш Феофане, приими сие малое моление наше, и умоли милосердаго Господа избавитися нам бед временных и мучений вечных, да идеже ты ныне, пастырю наш добрый, тамо и мы, чада твоя суще, сподобимся воспевати Царю Славы: Аллилуиа.
(Сей кондак глаголется трижды. И паки икос 1-й и кондак 1-й).
Источник: Сайт www.rus-kirche-baden.de [2015-01-18]
Статья опубликована участником [otcgnd] 2015-01-18, последний раз редактировалась участником [otcgnd] 2015-01-18. Со временем любая информация устаревает. Если Вы нашли ошибки или устаревшие сведения в этой статье, сообщите об этом.
В основной раздел 'Феофан Рыхловский, прп.'.