Меню сайта

Начальная страница
Иконы Богородицы
Иконы Иисуса Христа
Иконы Ангелов
Иконы Святых
Минейные иконы
Модерация
Опознание икон
Новое на сайте
Оффлайн-каталог
Аудиозаписи канонов
О проекте / конт@кт
Помочь сайту
Форум

Пользователь

Работаем анонимно.
Вход | Регистрация

Акафист Божией Матери Одигитрия Югская

Икона Одигитрия Смоленская Югская
Эта страничка относится к разделу

b   Икона Пресвятой Богородицы Одигитрия Смоленская Югская


Кондак 1
 Взбранной Воеводе, Царице Небесе и земли, / путеводящей верныя люди Своя к тихому и доброму пристанищу, / похвальная пения приносим Ти раби Твои, Богородице. / Ты же, Всемилостивая Заступнице, всех притекающих к Тебе с верою, / от всякаго навета вражия и злаго обстояния избави, да зовем Ти: //
Радуйся, Благословенная Владычице, / мир и благоденствие верным подающая.
 Икос 1
 Ангел земный и человек небесный, Псково-Печерския обители старец Дорофей, предъизбран бысть свыше, да послужит прославлению образа Твоего, Пренепорочная Владычице: ибо той непрестанно молися и восхваляше Тя во вся дни живота своего. Мы же грешнии подражати ему дерзающи глаголем:
Радуйся, радость спасения миру Христа Бога родившая;
Радуйся, Престоле огнезрачный, Богомладенца во чреве Своем носившая;
Радуйся, розго неувядаемая, к древу жизни нас приводящая;
Радуйся, Купино неопалимая, Божественный Свет нам открывающая.
Радуйся, Милосердная Мати, первородную клятву разрушающая;
Радуйся, Неисчерпаемая милосердия бездно;
Радуйся, от глубины грехопадений нас избавляющая;
Радуйся, преступления Адама и Евы свобождающая.
Радуйся, Благословенная Владычице, / мир и благоденствие верным подающая.
 Кондак 2
 Видяще чудесное сияние от предивнаго образа Твоего, Пресвятая Дево, и слыша таинственный глас: «Иди в указанное Мною место, и вземши сущую тамо икону Мою, именуемую Одигитрия, гряди с нею во отечество твое, тамо бо добр себе покой обрящеши», преподобный Дорофей,  благодарственно воспе Богу: Аллилуия.
 Икос 2
 Разумев посещение Царицы Небесныя, старец схимонах слезно со страхом моляшеся и изшед из обители Псково-Печерския, путь творя на Югу реку, идеже достигнув избраннаго места чудо узрел еси: яко образ Богоматере Пречистыя озарися Небесным светом и недвижим бысть от места того. Узрев сие чудо, воспе Преблагословенней:
Радуйся, Путеводительнице Благая, на путь спасения нас наставляющая;
Радуйся, кораблю спасения плавающих в пучине житейских страстей;
Радуйся, Всемощная покровительнице, покровом Своея благости нас осеняющая;
Радуйся, анкир спасения и тихое пристанище всем притекающим к Тебе;
Радуйся,  Росо Небесная, милостию небесною от стези неправедныя избавляющая;
Радуйся, мосте Божественный, приводящий к Животу;
Радуйся, Светоносный облаче, благодатию Святаго Духа исполненный;
Радуйся, тихая Заступнице усердно молящихся Тебе.
Радуйся, Благословенная Владычице, / мир и благоденствие верным подающая.
 Кондак 3
 Сила изыде благодатная от образа Твоего, о Богомати, егда дошедши до места Тобою избраннаго и не хотяше далее идти рекла еси, Пречистая, к путь творящему старцу Дорофею: «Почто порываеши с места сего икону Мою? Место сие избранно  и угодно Мне. Зде будет икона сия, и благодать Моя с нею во веки». Видяще сие попечение Царицы Небесныя о роде человечестем прослави Бога: Аллилуия.
 Икос 3
 Имея преподобный помышление в себе несумненное прославити образ Пресвятыя Девы Одигитрии на Юге чудотворениями явленный, сотвори Дом Божий в славу и честь Твою, да видят вси приходящии с верою чудеса преславная от Твоего Пречистаго образа и восхвалят Тя:
Радуйся, певаемая от ангел и прославляемая от Серафим;
Радуйся, лики Небесныя и земныя сочетавшая;
Радуйся, моления наша приемлющая;
Радуйся, Помоще всех притекающих к Тебе;
Радуйся, Честнейшая Херувим и Славнейшая без сравнения Серафим;
Радуйся, Архангельскую песнь приимшая;
Радуйся, на спасение мира Богомладенца родившая;
Радуйся, Мати Живота и  Надеждо спасения вечнаго.
Радуйся, Благословенная Владычице, / мир и благоденствие верным подающая.
 Кондак 4
 Бурю внутрь имея помышлений сумнительных, крестьянин некий злым духом одержим бываше и притекше к Тебе со умилением и слезами об избавлении от демонскаго мучения моляшеся, и внезапу исцеление получи, воспе Христу Богу: Аллилуия.
Икос 4
 Слышавше о чудесех от Югскаго образа Твоего, Царице Небесная, вси окрест живущии с верою и любовию прибегаше к Пречистому образу Твоему, и прияв от него исцеления от всех недугов душевных и телесных, возгласи Тебе:
Радуйся, Божественный Покрове всех притекающих к Тебе;
Радуйся, скорая Услышательнице в молитвах наших;
Радуйся, скорбящих радосте, обидимых заступление;
Радуйся, в недузех скорое поможение;
Радуйся, милосердная Целительнице душ наших;
Радуйся, Святая Заступнице от действа диавольскаго избавляющая;
Радуйся, всякаго прибегающаго с верою и любовию приемлющая;
Радуйся, упование и предстательство верных.
Радуйся, Благословенная Владычице, / мир и благоденствие верным подающая.
 Кондак 5
 Боготечней звезде подобна явися икона Твоя, Владычице, егда девица со слезами много моляся пред чудотворным образом Твоим, прося об исцелении от слепоты душевныя и телесныя. Ты же Свет Небесныя радости той подала еси, открывая очи души и тела, да вси восхвалим Бога: Аллилуия.
Икос 5
 Видевше токи чудес от Югския иконы Твоея, мнози людие стекахуся на поклонение к ней. Ты же, о Всепетая Дево, всем, по коегожде потребе милостивно подавала еси, да христоименитии людие с сокрушенным сердцем благодарственно прославляют Тя:
Радуйся, чудес неисчерпаемая бездно;
Радуйся, потребная изливающая яко мед и млеко;
Радуйся, Целительнице душ и телес наших;
Радуйся, Скоропослушливо внемлющая молитвам смиренных;
Радуйся, Милостивая, руку помощи требующим простирающая;
Радуйся, Всецарице, от недугов избавляющая;
Радуйся, Живоносный источниче Божия благодати;
Радуйся, Чаше Неиспиваемая, Ею же получаем спасение.
Радуйся, Благословенная Владычице, / мир и благоденствие верным подающая.
 Кондак 6
 Проповедают преславная чудеса Твоя, Царице Всепетая, вси людие православнии, ибо милость Свою источаеши на весь род христианский, спасая Покровом Своея благости от всех наветов вражиих и молитвами Своими избавляя от всех бед и напастей, да поим Богу: Аллилуия.
 Икос 6
 Возсияла еси икона Твоя, Пречистая Дево, Югская Одигитрия, яко звезда пресветлая среди звезднаго неба множества чудотворных икон Твоих, имиже вся вселенная просвещается Божиею благодатию, подвизая нас хвалебно взывати Ти:
Радуйся, первописанный образ Твой благословившая;
Радуйся, благодать Свою чрез чудотворныя иконы явившая;
Радуйся, Покрове от всякаго зла всех притекающих к Тебе;
Радуйся, Всех скорбящих радосте и обидимых заступнице;
Радуйся, яко Отраду и Утешение сердцам человеческим в скорбех посылаеши;
Радуйся, Взыскание погибших от глубины греховныя;
Радуйся, Заступнице наша, иконою Твоею нам помогающая;
Радуйся, кающихся грешников Споручнице Державная;
Радуйся, Благословенная Владычице, / мир и благоденствие верным подающая.
 Кондак 7
 Хотящи явити милосердия Своего бездну, из глубины греховныя извела еси всех притекающих к Тебе с верою, да от смерти греховныя избавльшеся, на стези правыя нози направим и восхвалим Бога: Аллилуия.
 Икос 7
 Новая и предивная чудеса явишася от иконы Твоея, Владычице, яко расслабление ног имущии, мужи и жены, прилежно с плачем моляхуся и молебное пение в церкви творяху пред Пречистым образом Твоим, исцеление прияша от своих болезней и прославляху Тя:
Радуйся, Милосердная Мати, пути спасительному наставляющая;
Радуйся, Путеводительнице к исполнению Заповедей Господних;
Радуйся, на стези правыя грешных направляющая;
Радуйся, Твоими же молитвами на путь нечестивых не идем;
Радуйся, путьшествовати хотящим благословение подающая;
Радуйся, в напастех внезапных скорая Помощнице;
Радуйся, Молитвеннице о нас непостыдная;
Радуйся, Одигитрие, Царице Всепетая.
Радуйся, Благословенная Владычице, / мир и благоденствие верным подающая.
 Кондак 8
 Странно и преславно явися заступление Твое, Богоизбранная Дево, егда избавление от мороваго поветрия людие получиша, имея Тя предстательницу теплейшую и молитвенницу непостыдную, тогда воспеша Богу: Аллилуия.
 

Икос 8
 В вышних пребывающи селениих и нижних не отступаеши, пребыла еси в чистоте нетленна, бывши до рождества, в рождестве и по рождеству Спасителя нашего Дева. Темже Тя сосуд избранный видяще, девы, свещи целомудрия носящи, восхваляют Тя:
Радуйся, Неувядаемый цвете Девства;
Радуйся, крине нетления и чистоты;
Радуйся, рождество и девство сочетавшая;
Радуйся, непорочно девство сохраньшая;
Радуйся, светоносный целомудрия столпе;
Радуйся, Дивная наставнице девства и чистоты;
Радуйся, Предивная целомудрия блюстительнице;
Радуйся, девствующих скорая Услышательнице.
Радуйся, Благословенная Владычице, / мир и благоденствие верным подающая.
Кондак 9
 Вси роди блажат Тя, Царице Всепетая, а наипаче девицы, прославляющия Тя во псалмех и пениих духовных, и просящия — да даруеши им достойнаго спутника жизни, и создав малую Христову Церковь, воспоют Христу Богу: Аллилуия.
 Икос 9
 Ветийство всякое земнородных не довлеет к прославлению иконы Тобою явленныя, иже за неизреченный Твой дар и многую благость, в Кане Галилейстей испроси у Сына Своего сотворити чудо и тем брак благословити. Тако и ныне вси прибегающии к покрову Твоему обретают благодатныя дары и глаголют:
Радуйся, молитвою Твоею Церковь домашнюю благословением Божиим венчающая;
Радуйся, любовь друг ко другу в союзе мира стяжати помогающая;
Радуйся, в супружестве живущих умудряющая;
Радуйся, Твоим предстательством неувядаемый венец славы получити сподобляющая;
Радуйся, Спорительнице хлебов, питающая от росы Небесныя свыше;
Радуйся, Исполнение домов их всякия благостыни;
Радуйся, дев Младопитательнице и матерей тихое радование;
Радуйся, отроков дивное наставление.
Радуйся, Благословенная Владычице, / мир и благоденствие верным подающая.
 Кондак 10
 Яко к спасительному и тихому пристанищу прибегаем к Тебе, Дево Чистая, вси грехми обремененнии и со слезами просим Тя: испроси у Христа Бога прощение всех прегрешений наших, да изшедше из грубины греховныя, достигнем Царствия Небеснаго и восхвалим Спаса Христа Бога: Аллилуия.
 Икос 10
 Стеной и заступлением показася образ Твой честный Одигитрии Югския, иноком православным, и всем подвижником девства и чистоты во брани их к началом и властем и миродержителем тьмы века сего, да ибавльшеся от прелести греховныя прославим Тя:
Радуйся, Взбранная Воеводо Небесных сил;
Радуйся, Победительнице первыя клятвы;
Радуйся, яко рождеством Сына Твоего ад попрася;
Радуйся, яко предстательством Твоим смерть умертвися;
Радуйся, покаяния плачь приемлющая;
Радуйся, молитвеннице о нас грешных;
Радуйся, ходатаице о нас Непостыдная;
Радуйся, из глубины греховныя Избавительнице.
Радуйся, Благословенная Владычице, / мир и благоденствие верным подающая.
 Кондак 11
 Пение наше смиренное от полноты души нашея приносимое не презри, Предивная Дево, ибо како мы возможем воспети вся преславная от Тебе бываемая грешными устами. Ты же явися нашей Споручницей от смертоноснаго греха, да спасаемии помощию Твоею, воскликнем Богу: Аллилуия.
 Икос 11
 Светлыя лучи чудес всему миру от иконы Твоея источаеши, грешных на путь спасения наставляеши, в скорбех защищаеши, от напастей избавляеши, прибегающих к Тебе в недузех скоро исцеляеши. Имуще таковую пречудную Путеводительницу ко спасению, радостно глаголем Ти:
Радуйся, Милостивая приятельнице молитв смиренных;
Радуйся, скорая Услышательнице кающихся грешников;
Радуйся, прошения наша во благо исполняющая;
Радуйся, скорбная сердца возвеселяющая;
Радуйся, во всех недузех исцеление подавающая;
Радуйся, слепым душевнеи и телеснеи очи открывающая;
Радуйся, расслабленныя со одра болезни возставляющая;
Радуйся, злыя духи от человеков отгоняющая.
Радуйся, Благословенная Владычице, / мир и благоденствие верным подающая.
 Кондак 12
 Благодать Божию испроси  нам у Христа Бога, да шествуем по стезям Заповедей Господних не уклоняяся от праваго пути, и спасаеми Твоими молитвами избавимся вечнаго осуждения, и достигше Царства Небеснаго прославим Бога: Аллилуия.
 Икос 12
 Предстояще Тебе со умилением, и поюще преславная чудеса и велюю милость, явленную нам от Югскаго образа Твоего, величаем и прославляем непрестанно Тя, Владычице Всепетая, избавляющая нас от всякия скорби и печали, и радостно вопием:
Радуйся, Благодатная, Господь с Тобою;
Радуйся, Препрославленная от всех родов;
Радуйся, Честнейшая горних воинств;
Радуйся, Пресвятая Царице Неба и земли;
Радуйся, Престол Божий во чреве Своем вместившая;
Радуйся, непорочно Христа Спаса родившая;
Радуйся, Виновнице спасения нашего;
Радуйся, смертное наше естество в безсмертие облекшая.
Радуйся, Благословенная Владычице, / мир и благоденствие верным подающая.
 Кондак 13
 О Всепетая Мати, Благословенная Владычице, Путеводящая ко спасению всех с верою к Тебе притекающих, нынешее приемши приношение,  помози мирно прейти бурную пучину скорбнаго сего жития, спасая нас от всякия нужды и печали, и избави грядущаго вечнаго осуждения, да водворяяся в райских селениих, воззовем: Аллилуия.
 (Сей кондак читается трижды, затем икос 1 и кондак 1)

Статья опубликована участником [tol] 2015-09-20, последний раз редактировалась участником [tol] 2015-09-20. Со временем любая информация устаревает. Если Вы нашли ошибки или устаревшие сведения в этой статье, сообщите об этом.

В основной раздел 'Икона Пресвятой Богородицы Одигитрия Смоленская Югская'.