Павел Таганрогский, блж.
 |
|
МОЛИТВЫ
Тропарь, глас 4:
Отечества Небеснаго взыскуя, / дом родителей твоих оставил еси. / Тленное богатство мира презрев, / обогатился от Господа многими чудесы и знаменьми. Воздержанием, труды и молитвою насладился еси, образ жития благочестиваго являя. / Темже и ныне с верою приходящим к тебе / во всяцех напастех помогаеши. / Блаженне отче Павле, / моли Христа Бога спастися душам нашим.
Кондак, глас 8:
От Небеснаго Врача дар исцелений приим, / разрешаеши болезни наши телесныя и душевныя. / Божественныя благодати столпе от земли до Неба явился еси, / о блаженне Павле, моли Христа Бога спасти град и люди, тебе почитающия.
Величание:
Ублажаем тя,/ святый блаженный отче Павле, / и чтим святую память твою, / ты бо молиши за нас Христа Бога нашего.
Молитва 1:
О великий угодниче Божий и чудотворче, святый блаженный Павле! Ты, на высоту добродетелей возшед, яко пресветлая звезда житием твоим возсиял еси, и странническое жительство избрав, мира сего красная ни во чтоже вменил еси. Темже Всеправедный Судия многими чудесы тя прослави. Душу же твою святую в небесные обители всели, идеже любви Божией наслаждаяся, и наши нужды зриши, прошения слышиши. Буди нам в недузех целитель, по морю плавающим кормчий и утопающим благонадежное избавление. Молимся тебе, Павле блаженне: испроси всем, во всякой нужде сущим и ко твоему заступлению прибегающим, всякий дар коемуждо благопотребен: веры и любве преспеяние, благочестия умножение, мира утверждение, больным исцеление, печальным утешение, бедствующим помощь, обиженным защищение. И сподоби ны угодниче Божий молитвами твоими благочестно житие земное скончати, Небесное Царствие и жизнь вечную унаследити, со всеми святыми, в бесконечныя веки веков, аминь.
Молитва 2:
О преблаженне угодниче Христов Павле, южных пределов страны нашея пред Господем заступниче! Ты еще во плоти сый, красная мира сего Христа ради ни во чтоже вменил еси, и на путь спасения люди словесы и деяньми наставлял еси. Был бо всем приходящим к тебе скорый помощник и молитвенник. И ныне в вышних Святей Троице предстоя, имаши сугубое дерзновение ко Владыце, освяти бо тя Господь Вышний яко Своего угодника. Блажен есть воистину град и место, на немже положено бысть честное тело твое. Сего ради молимся тебе: буди и нам помощник и заступник, избавляй нас от враг видимых и невидимых, такожде и всех, не токмо зде во граде Таганроге, но и всюду призывающи имя твое святое. Призри, преблаженне Павле, на нас многогрешных, ныне творящих память твою, и милостив буди нам, с верою притекающим к многоцелебным мощем твоим, яко да спасени будем твоими молитвами, и непрестанно славим Пресвятую Троицу, Отца и Сына и Святаго Духа, ныне и присно и во веки веков, аминь.
Источник: [2016-02-05]
Статья опубликована участником [Olga74] 2016-02-05, последний раз редактировалась участником [Olga74] 2016-02-05. Со временем любая информация устаревает. Если Вы нашли ошибки или устаревшие сведения в этой статье, сообщите об этом.
В основной раздел 'Павел Таганрогский, блж.'.