Тропарь, кондак, величание, акафист, молитва и служба святому праведному Иоанну Кормянскому
 |
|
Тропарь, кондак, величание св. прав. Иоанну Кормянскому
Тропарь святому Иоанну, глас 4
Святче Божий, отче наш праведне Иоанне, / пресвитере славне стада Христова, / свято житие твое совершив, / даром прозрения и исцеления Господь тя одари, / и ныне нетленным телесем с нами пребывая, / моли Христа Бога нашего, / да спасет Господь души наша, / почитающих, блаженне, святую память твою.
Кондак святому праведному Иоанну, глас 6
От чрева матери дивно прореченный, / избранник Божий явился еси, / не токмо в житии Богом прославленный, / но и по смерти нас не оставивый, / в дивном явлении руце за род православный ко Христу простирая, / молися Владыце всех царю / помиловати нас, чтущих святую память твою.
Величание святому праведному Иоанну
Величаем тя, святый праведный отче наш Иоанне, / и чтим святую память твою, / ты бо молиши за нас Христа Бога нашего.
Акафист св. Иоанну Кормянскому
Кондак 1
Избранный угодниче Христов, святе праведне Иоанне, / от чрева матери на служение Богу избранне / и юродивым старцем служителем Церкви Господней предреченне, / житием твоим праведником Божиим уподобивыйся, / темже и Господь обогати тя даром прозрения и исцеления. / Мы же, чада Церкви Православныя, с любовию да зовем ти:
Радуйся, Иоанне пресвитере, чудотворче и целителю.
Икос 1
Ангельские силы на небесе возрадовашася, аки предреченно еще во чреве матери быти тебе служителем Церкви Божией, отче праведне Иоанне. Темже прослави тя Господь в житии твоем славне, даром прозрения обогати тя, источник исцелений содела мощи твоя нетленная. Мы же, ведуще славу Божию в тебе нам явльшуюся, да зовем ти с радостию велией:
Радуйся, Церкви Православныя новая похвало,
Радуйся, Царствия Божия небожителю.
Радуйся, даром прозрения одаренный,
Радуйся, даром исцеления обогащенный.
Радуйся, дальняя аки ближняя предвидевый,
Радуйся, волю Божию людям вещавый.
Радуйся, служителем Церкви предреченный,
Радуйся, Богородицею прославленный.
Радуйся, Иоанне пресвитере, чудотворче и целителю.
Кондак 2
Виде отец твой пресвитер знамение Божие в рождестве твоем, крещая тя Иоанном нарече в честь апостола любве, Господу же возгласи хвалебную песнь со Ангелы: Аллилуиа.
Икос 2
Бысть отрочество твое в храме Покрова Богородицы прохождаемо, Ея же теплым заступничеством и водительством охраняемо, аки птенец Богу в жертву непорочну принесенный, тако и ты, Господом возлюбленный, измлада служити Ему избранне, похвальную песнь приносим и мы тебе таковую:
Радуйся, Богом измлада избранне,
Радуйся, старцу родителю послушен бывый.
Радуйся, молитвы матери твоея плод добрый явивый,
Радуйся, житие богоугодное родителей твоих возлюбивый.
Радуйся, плод молитвы их, аки цвет расцветший,
Радуйся, надеждо их и веселие.
Радуйся, труды старческие им облегчивый,
Радуйся, старость их упокоивый.
Радуйся, Иоанне пресвитере, чудотворче и целителю.
Кондак 3
Избра тя Господь на служение славное, видя души твоея чистоту, постави тя пастырем Церкви Божией и стадо словесных овец тебе вручи, да пасеши его со усердием, поя Господу песнь: Аллилуиа.
Икос 3
Божественная Благодать, немощная врачующая и оскудевающая восполняющая, восполнися в тебе, сосуде избранный Духа Святаго, праведне отче наш Иоанне. Постави тя светильника верху горы высокия, мы же, видяще дивные дела Божия, во умилении зовем ти тако:
Радуйся, пресвитере Богом избранне,
Радуйся, светильниче, во тьме века возсиявший.
Радуйся, стадо Христово от волков хищных упасший,
Радуйся, чада духовныя ко Христу приведый.
Радуйся, пастырю неленостный,
Радуйся, праведному Иоанну Кронштадтскому подражавый.
Радуйся, духа злобы от стада Христова отгнавый,
Радуйся, заблудшия овцы взыскавый.
Радуйся, Иоанне пресвитере, чудотворче и целителю.
Кондак 4
Дивный молитвенник явился еси, отче праведне Иоанне: не токмо во дни, но и в нощи предавался еси Господеви в молитве, воспевая со ангелы Ему хвалебную песнь: Аллилуиа.
Икос 4
Видяще тя щедродателя велия, сирии и вдовицы притекаху к тебе, отче, ты же одарил еси их дарами коемуждо на потребу, смерти гладныя их избавляя, темже и мы молим тя: избави и нас от глада и нестроения в бытии земнем сем: мы же благодарно тебе воспоем:
Радуйся, к земным благам пристрастия не имевый,
Радуйся, вдовицу со чады ея от гладныя смерти препитавый.
Радуйся, нищих одаривый,
Радуйся, сирых защитивый.
Радуйся, странников приявый,
Радуйся, нагих одеявый.
Радуйся, алчущих и жаждущих утешивый,
Радуйся, яко в темницех и больницех отверженных посетивый.
Радуйся, Иоанне пресвитере, чудотворче и целителю.
Кондак 5
Боготочный источник явился еси, отче Иоанне, силою молитвы твоея бесы отгоняя, болящия исцеляя, от греха на путь правый заблудшия наставляя, не остави и нас сирых и убогих, но твоими молитвами спасаеми, и мы воспоим хвалебную песнь в Троице славимому Богу: Аллилуиа.
Икос 5
Видяще подвиги Твоя земная, пресвитере славне Иоанне, Христос даром исцелений тя одари, да и мы, ведуще в тебе сосуд силы Божией, преисполненный всякия цельби и благостыни, зовем ти сице:
Радуйся, источниче исцелений,
Радуйся, сосуде Богом избранный.
Радуйся, врачевом безмездным уподобивыйся,
Радуйся, белезни неисцельныя исцеливый.
Радуйся, врачами оставленных не оставивый,
Радуйся, телу моему здравие даровавый.
Радуйся, прощение грехов моих у Господа испросивый,
Радуйся, душу мою от сна лености воздвигнувый.
Радуйся, Иоанне пресвитере, чудотворче и целителю.
Кондак 6
Хотя уподобитися странникам мира сего в Лавру Киевскую последовал еси, тамо благословение от старцев ея приял еси, да житием своим преподобным подражая, воспеваеши со печерскими святыми: Аллилуиа.
Икос 6
Новаго неба и новыя земли в обетовании Христове ожидал еси, да и нас подражати тебе научил еси: на всяк день Господу угождати, в молитве неленостно пребывати, в посте не расслаблятися, в труде плоть умерщвляти и тебе воспевати:
Радуйся, молитвою небо и землю соединивый,
Радуйся, в видении руце ко Господу простиравый.
Радуйся, пришествие Богородицы в храме предвидевый,
Радуйся, храм в честь Покрова Ея соорудити благословивый.
Радуйся, место строительства его указавый,
Радуйся, со пресвитеры его освятивый.
Радуйся, в нем же место славно себе уготовавый,
Радуйся, яко и ныне телесем нетленным в нем почиваеши.
Радуйся, Иоанне пресвитере, чудотворче и целителю.
Кондак 7
Провозвестник грядущаго испытания явился еси, земли Российстей слезами и кровию омытися возвещал еси, слезы теплые пред Лицем Божиим проливал еси, да сменит Господь гнев Свой на милость над нами, воспевая Ему вечную песнь: Аллилуиа.
Икос 7
Егда прииде скорбь на землю нашу, избави тя Господь сего страшнаго видения, призва тя в райския обители, ты же завещал еси нам яко к живому к тебе приходити и мольбы своя изливати пред тобою. Мы же, исполняя заповедь твою, во умилении сердца зовем ти тако:
Радуйся, яко нетлением Господь тя прослави,
Радуйся, яко душею пред Творцом предстоиши.
Радуйся, яко телесем с нами пребываеши,
Радуйся, яко скорбем и печалем нашим внемлеши.
Радуйся, яко отраду божественную нам подаеши,
Радуйся, яко и воздыхание наше слышиши.
Радуйся, яко радованию нашему сорадуешися,
Радуйся, яко чад своих не оставляеши.
Радуйся, Иоанне пресвитере, чудотворче и целителю.
Кондак 8
Дивно прослави Господь телесе твое, праведне отче наш Иоанне. Гроб твой тлению земли не предадеся и телесе твое, яко адамант драгоценный, в нем сохранися. Многая лета память твоя забвена бысть, но Христос тя яко светильник на свещницу постави, да мрак мира сего озариши. Мы же Господа прославим песнью: Аллилуиа.
Икос 8
Всяк возраст стар и млад прослави тя, отче Иоанне, егда обретеся нетленное телесе твое и многая знамения и чудеса совершашася, болящии исцеляшеся, слепые прозреваша, хромии хождаше. Мы же, видяще в тебе источник исцелений, со слезами воспеваем ти сице:
Радуйся, пресвитерами славно обретенный,
Радуйся, народом православным почитаемый.
Радуйся, слепым прозрение подающий,
Радуйся, хромых исцеливый.
Радуйся, расслабленных жилами укрепивый,
Радуйся, токи крове остановивый.
Радуйся, отчаянных во врачевании не оставивый,
Радуйся, в скорбех душу мою утешивый.
Радуйся, Иоанне пресвитере, чудотворче и целителю.
Кондак 9
Всех приходящих ко гробу твоему не оставляеши, коемуждо на пользу души подаеши и Господа умоляеши: да пришедшии к тебе в скорбех и печалех истощенни не отыдут, но источник утешения в тебе обретут, Спасу душ наших воззовут: Аллилуиа.
Икос 9
Ветии богохвальнии не возмогут достойно восхвалити пучину чудес, чрез тя Богом явленную. В видениях сониих являешися и веру слабоверных укрепляеши, да с радостию и надеждою ко гробу твоему притекают и сердцем чистым тебе зовут:
Радуйся, яко вера православная тобою укрепися,
Радуйся, яко любовь тобою умножися.
Радуйся, яко надежда наша оправдася,
Радуйся, крине райскаго прозябения.
Радуйся, кимвале восклицания,
Радуйся, гусли сладкозвучные.
Радуйся, ковчеже позлащенный,
Радуйся, каменю драгоценный.
Радуйся, Иоанне пресвитере, чудотворче и целителю.
Кондак 10
Свет чудес новых излия Господь Вседержитель, егда бысть обретение нетленнаго телесе твоего. Дивный огнь от иконы Царицы Небесныя на гроб твой изыде, мы же, видевше славная чудеса сия, верою окрепшею Отца Небеснаго прославиша: Аллилуиа.
Икос 10
Светоподатель Господь, желая спасения всякой плоти человеческой, пророки и апостолы на проповедь посылая, мученики и святители венцем нетленным венчая. Тако и тя, отче наш Иоанне, с преподобными в лике праведных прослави, а нас научи тебе воспевати:
Радуйся, добрая ветвь винограда Христова,
Радуйся, лозо многоплодовитая.
Радуйся, верныя ко Христу приведый,
Радуйся, заблудшия неотринувый.
Радуйся, мног плод духовный о Христе сотворивый,
Радуйся, путь спасения нам указавый.
Радуйся, яко же и сам ко Христу путем тесным следовавый,
Радуйся, яко и нас на стезю правды наставивый.
Радуйся, Иоанне пресвитере, чудотворче и целителю.
Кондак 11
Пение хвалебное приносят ти, отче праведне Иоанне, обретшии спасение твоими молитвами от бед и скорбей и всяких напастей, да купно с тобою радостно поют Богу: Аллилуиа.
Икос 11
Светозарным светом бысть житие твое, отче праведне Иоанне. Да и нам грешным путь ко спасению указуя, зарю общего воскресения предвозвещая, маловерныя уверяя, верныя подкрепляя, темже купно да зовем ти:
Радуйся, пастырю наш вселюбимый,
Радуйся, защитниче наш от врагов спасения непреоборимый.
Радуйся, козни диавольския молитвою победивый,
Радуйся, Христа житием твоим прославивый.
Радуйся, Богородицы избранниче неложный,
Радуйся, сослужения Ангельскаго удостоивыйся.
Радуйся, в сониях на молитву к ходатайству твоему призвавый,
Радуйся, яко и мене грешнаго Благодати Божия не лишивый.
Радуйся, Иоанне пресвитере, чудотворче и целителю.
Кондак 12
Благодать свыше ниспосли всем нам, притекающим с любовию к раце мощей твоих, и испроси у Господа прощение согрешений наших, болящим же и страждущим исцеление даруй, да благодарственно вси вопием дивному во святых Богу: Аллилуиа.
Икос 12
Житие твое славно Господь прослави, человека небеснаго и ангела земнаго нам показавый. Мы же, ведуще многая знамения у гроба твоего происходяща, молим тя, отче наш Иоанне, да твоими молитвами укрепится в нас вера православная, в ней же наше спасение, и тебе мы поем восхваление:
Радуйся, фимиам кадильный Богу принесший,
Радуйся, во иереях ему послуживый.
Радуйся, тайнозрителю Божия благодати,
Радуйся, покровителю сирот и вдов.
Радуйся, ересей искоренителю,
Радуйся, правыя веры насадителю.
Радуйся, яко тобою Господь прославися,
Радуйся, яко тобою Вера Православная утвердися.
Радуйся, Иоанне пресвитере, чудотворче и целителю.
Кондак 13
О преблагий угодниче Божий, святый праведный отче наш Иоанне, приими сие малое моление наше аще недостойне тебе приносимое, но с любовью сыновнею припадающе вопием ти: избави нас от недуга душевнаго и болезни телесныя, да и мы в покаянии плод добр Господеви принесем и с тобою в Царствии Небеснем Ему воззовем: Аллилуиа.
Сей Кондак глаголи трижды.
А по сем чтется Икос 1
и Кондак 1.
Молитва
О преславный угодниче Божий, святый праведный отче наш Иоанне! Ныне припадая к раце с цельбоносными мощами твоими, из глубины души тебе зовем, о святче Божий, не отрини нас, сирых и убогих, во гресех рожденных и плод достойный покаяния не принесших. Тебе, яко имеющему дерзновение пред Господем, со слезами взываем: исцели болезни наша телесныя, укрепи души наша маловерныя. Умоли Господа даровати нам радость покаяния и жития нашего исправление. Испроси у Бога земли нашей плодородие, дожди мирны и воздухи благорастворенны. Церковь нашу твоими молитвами незыблемо огради от ересей и расколов. Обитель сию и храм сей до скончания века сохрани, и по кончине жития нашего во обители Отца Небеснаго нас водвори, да и мы тамо купно с тобою и всеми святыми прославим в Троице Единаго Бога Отца, и Сына, и Духа Святаго.
Аминь.
Служба святому праведному Иоанну Кормянскому
На велицей вечерне
Поем Блажен муж: первый антифон.
На Господи воззвах: поставим стихов 8
и поем стихиры, глас 3:
Приидите празднолюбцы, увенчаем песнми солнце незаходимое и едиными устнами восхвалим светило великое, пастыря добраго пресвитера Иоанна, образ жизни во Христе нам явльшаго, и молитвою пламенною бесы поправшаго, Церкви Российския новую похвалу, земли Белорусския сокровище неистощимое, и царства Божия небожителя, егоже молитвами да спасет Христос души наша. (дважды)
Путь неложный показал еси нам, блаженне, како подобает мирскую суету оставляти и Христу Жениху Небесному угождати, уподобитися пяти девам мудрым и светильники душ наших уготовати во тьме сущей, делы добрыми озарити вход Христа, и совнити с Ним на брачный пир, отрешитися суеты мира сего, да твоими молитвами и нас приведеши ко Христу Спасу душ наших. (дважды)
Всем сердцем возжелал еси работати Господеви, с юных лет во храме обретался еси, пением и чтением благоугождая Христу, возгорелся еси из глубины души, и последовал стопам достопамятного отца твоего, место славное у Престола себе обретая, любовию пламенея, николи же зла за зло воздая, но яко птенец кроткий молитву изливал еси Господеви, да даст ти место служения храм Девы Марии, Еяже молитвами и нас ко Христу приведи, отче праведный наш Иоанне.
Всех нищих и убогих ублажал еси, всем подавая не токмо на пользу телесную, но и молитвами твоими, души убогие благодатию Духа обильно наполняя, трудолюбие жилища в себе показуя, поучал труды к трудом прилагати, со смирением и молитвами крест свой понести, и тако труды земными сотворити в душе своей Царство Небесное, да изыдет Христос и обрящет храмину добрую, украшенную трудами добродетельными, подвиги многими и молитвами теплыми, сияющи чистотою покаяния: да и мы обрящем сердца наша чистыми, почитающе блаженную память твою, отче наш Иоанне.
Путеводящая звезда, озаряющая мрак жития нашего, явился еси нам праведне Иоанне, во тьме века неверия возсиявшая, светом своим путь просветившая, и многи ко спасению приведшая, лучами благодати покрывшая, и не отринувшая нас от единыя Надежды — Христа, указавшая во мраце жития — Свет, Свет возсиявший на спасение душ наших.
Сердце чисто созиждет в тебе Господь, показуя нам правило веры и образ кротости, смирения пучину великую, милосердия источник неиссякаемый, покаяния слезы преизрядныя, милости подателя благаго, миротворца и молитвенника причудна, ангела земнаго и человека небеснаго, жителя Иерусалима горняго, небесных чинов сослужителя и на небеси сожителя, о Церкви Российстей теплаго предстателя, и земли Белорусския чудотворца предивна.
Слава, глас 1:
Сердцем веровал еси в правду, священниче Божий, устны же глаголал еси во спасение: Господь крепость мне даст, Господь миром меня оградит, Господь сила моя, Господь слава моя, Господь разум мой утвердит, Господь наставит мя ко спасению, Господь в сердце моем поживет, и соделает душу мою храмом Своим. Тако и мы тебе вопием: Господь прослави тя на небеси, и мы грешнии прославляем тя на земли.
И ныне, догматик, глас тойже.
Вход. Прокимен дне. Чтения три.
Притчей чтение
Желания благочестивых наслаждают душу: дела же нечестивых далече от разума. Ходяй с премудрыми премудр будет: ходяй же с безумными познан будет. Согрешающих постигнут злая: праведных же постигнут благая. Благ муж наследит сыны сынов. Праведнии насладятся в богатстве лета многа: неправеднии же погибнут вскоре. Иже щадит жезл свой, ненавидит сына своего: любяй же наказует прилежно. Праведный ядый насыщает душу свою: души же нечестивых скудны. Мудрыя жены создаша домы: безумная же раскопа рукама своима. Ходяй право, боится Господа: развращаяй же пути своя, обесчестится. Из уст безумных жезл досаждения: устне же мудрых хранят я. Идеже несть волов, ясли чисты: а идеже жита много, явна волу крепость. Свидетель верен не лжет: разжизает же ложная свидетель неправеден. Взыщеши премудрости у злых, и не обрящеши: чувство же у мудрых удобно.
Премудрости Соломона чтение
Праведных же души в руце Божией, и не прикоснется их мука. Непщевани быша во очию безумных умрети, и вменися озлобление исход их: они же суть в мире. Ибо пред лицем человеческим аще и муку приимут, упование их безсмертия исполнено: и вмале наказани бывше, великими благодетелствовани будут, яко Бог искуси их и обрете их достойны себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут: судят языком и обладают людьми, и воцарится в них Господь во веки. Надеющиися нань уразумеют истину, и вернии в любви пребудут Ему, яко благодать и милость в преподобных Его и посещение во избранных Его.
Пророчества Иоилева чтение
Тако глаголет Господь: и уведите, яко посреде Израиля Аз есмь, и аз Господь Бог ваш, и несть иного разве Мене: и не посрамятся ктому людие Мои во век. И будет по сих, и излию от Духа Моего на всяку плоть, и прорекут сынове ваши и дщери ваша, и старцы ваши сония узрят, и юноты ваши видения увидят: ибо на рабы Моя и на рабыни Моя во дни оны излию от Духа Моего: и дам чудеса на небеси и на земли, кровь и огнь и курение дыма: солнце обратится во тму, и луна в кровь, прежде неже прийти дню Господню великому и просвещенному: и будет, всяк иже призовет имя Господне, спасется.
Стихиры на литии, глас 6:
Образ пастыря добраго зрим в тебе, отче Иоанне, яко не наемник был еси, а пастырь истинный стада Христова, овцы словесныя пасый, и волцы хищныя — грехи, молитвою пламенною отгонял еси, и ныне от нас отжени помыслы студныя и безумныя, да вопием прославившему тя Христу: слава Тебе Боже во веки.
О крепосте моя Сыне Божий, о свете ума моего, и мире, и радосте сердца моего от невидимых враг Избавителю мой, слава Тебе, тако взывал еси, отче праведне, вразуми и нас возвати всем сердцем Господеви: Иисусе Спасе наш, молитвами праведнаго Иоанна спаси души наша.
Сын Божий, пришедый в мир призвати к покаянию мытари и грешники, блудницы не отверже, и двери рая разбойнику отверзе, тако и ты отче Иоанне, к покаянию призва всех научи вопити мытаревым гласом: Боже, милостив буди мне грешному, Боже, очисти грех мой, слава Тебе.
Слава, глас 8:
Молящеся, Духом святым молимся, сего ради вся молитвы церковныя, дыхание Духа Святаго суть, и вси православнии рожденнии от него есмы. Прииди убо и вселися в ны Душе Святый, помилуй и соедини вся ны, да будем едино Тело Христово. Такова бысть непрестанная молитва твоя, праведный Иоанне, и послуша тя Бог, и помаза тя елеем радости вечныя.
И ныне, Богородичен, глас той же:
Кто повесть величия Твоя, Пресвятая Дево, небесная палато и руно Гедеоново, Христа Бога плотию нам родшая, величаем величия Твоя купно с праведным Иоанном, и едиными устнами Тебе вопием: Радуйся, обрадованная, Господь с Тобою.
На стиховне стихиры, глас 2:
Отче праведне наш Иоанне, житие твое на земли славно, и успение со святыми; смерть тебе бысть приобретение жизни вечныя, телесем нетленным с нами пребывая, и любовию всех согревая, молися о нас Христу Богу нашему, мир церкви нашея даровати, и душам нашим велию милость.
Стих: Расточи, даде убогим, правда Его пребывает во век.
Отче блаженне Иоанне, новая звезда возсиявшая над землею русскою, совокупившаяся лику древних святых, и прославленная архипастыри и пастыри, и всеми верными чадами церкви православныя, озари и нас светом сияния славы Сына Предвечнаго, Отца Небеснаго, Бога безсмертнаго, во спасение душ наших.
Стих: Готово сердце его уповати на Господа.
Отче премилостиве Иоанне, в житии бо твоем праведному Филарету поревновав. Имея богатство тленное ни во что вменил его, нищих, сирот и вдовиц одарил еси, сим богатством тленным приобрел еси у Христа богатство нетленное, и по слову Его обогатился тамо идеже ни червь, ни тля, ни татие не крадут, но пребывает оное вечно. Палаты незримыя в Царствии Божием создал еси, да и нас молитвами твоими вселиши в ня.
Слава, глас 4:
Радуйся, сокровище нетленное на небеси стяжавый. Радуйся, яко тамо вечно пребываеши, и нас грешных на земли не оставляеши. Радуйся, яко мощи твоя нетленныя яви нам Господь, да возрадуемся и мы, видяще нетление телесе твоего, яко Господь тя тако прослави.
И ныне, глас той же:
О, чудо велие мне! Ибо камень дражайший во мне почивает. Тако глаголет церковь Покровская. И откуда он преселился в мя! Тот, кто место славное мне предуказа, в прославлении имени Девы Марии, из Нея же родися Христос плотию, он же плотию нетленною во мне почи. О, чудо, Пресвятая Дево! Како вмещаю его, он же мя создати строители благослови, да и аз прославлю его, имене ради святаго Твоего.
По Ныне отпущаеши: тропарь святому дважды и Богородице Дево: единожды; аще же ни: Слава, святому, и ныне, Богородичен по гласу тропаря.
Тропарь, глас 4:
Святче Божий, отче наш праведне Иоанне, пресвитере славне стада Христова, свято житие твое совершив, даром прозрения и исцеления Господь тя одари, и ныне нетленным телесем с нами пребывая, моли Христа Бога нашего, да спасет Господь души наша, почитающих, блаженне, святую память твою.
На утрени
На Бог Господь: тропарь святаго, дважды.
Слава и ныне: Богородичен по гласу тропаря.
По 1-м стихословии седален, глас 5:
Знамением крестным и молитвою вражия искушения победил, постом и воздержанием Господеви благоугодил, тем же и приял от Христа Спаса дар исцеления и прозрения, подавай и нам вся яже на потребу у тя просяще, с верою притекающим к честным мощем твоим.
Слава, и ныне, Богородичен:
Ужасно чудо зачатия, и несказанен образ рождества в Тебе познася, Приснодево Чистая, ужасает мой ум и удивляет помышление слава Твоя, Богородице, всем простреся во спасение душ наших.
По 2-м стихословии седален, глас 1:
К Божественной высоте твоя руце воздев праведне, явился светоносне Иоанне, край земли Белорусския осветив, да возрадуется собор ея, звездою новою преукрашенный, ходатая тя приобретши дивнаго и славнаго, люди веры правыя вопиют ти: спасай нас, отче преблаженне, молитвами твоими.
Слава, и ныне, Богородичен:
Богородицу Тя прославляем, прославляющи дивнаго угодника Твоего Иоанна, яко предвозвести нам пришествие Твое во храм, да чудо с пастырем сотвориши, и место славное стопами святыми Твоими освятиши, моляще Сына Твоего спастися душам нашим.
Полиелей и величание:
Величаем тя, святый праведный отче Иоанне, и чтим святую память твою, ты бо молиши за нас Христа Бога нашего.
Псалом избранный:
Блажен муж бояйся Господа, в заповедех Его восхощет зело.
Седален по полиелеи, глас 3:
Отче Иоанне, алтаря Господня служителю, избранниче Божий, веры православныя ревностный проповедниче, был еси вместилище благодати Христовой, яко дарова тя Господь пастыря добра стаду Своему. Моли, отче святе, еже чадом Божиим нам быти, и спастися душам нашим молитвами твоими.
Слава, и ныне, Богородичен:
Купину неопалимую и лествицу высокую, кадильницу златую и манну небесную, жезл Ааронов и руно Гедеоново, Евы избавление и раю словесный, Церкви Православныя похвала и наше спасение в Тебе, Дево чистая обретаем мы земнороднии, да Твоим ходатайством и молитвами соделаемся достойни Царства Божия, благочестно покланяющияся пресвятому рождеству Твоему.
Прокимен, глас 4:
Священницы Твои облекутся в правду и преподобнии Твои возрадуются.
Стих: Помяни, Господи, Давида и всю кротость его.
Евангелие от Луки, зачало 26 (глава 6, стихи 31-36).
По 50-м псалме стихира, глас 6:
Праведных мужей ревнителя, блаженнаго отца нашего и учителя Иоанна, сошедшеся восхвалим глаголюще: радуйся, похвало веры православныя, благодатию и истиною освященная, отонудуже и приятилище был еси Духа Всесвятаго. И ныне со всеми святыми престолу Христову предстоя, молися присно о рабех Его, почитающих блаженную память твою.
Канон, глас 4
Песнь 1
Ирмос: Моря чермную пучину невлажными стопами древний пешешествовав Израиль, крестообразныма Моисеовыма рукама амаликову силу в пустыне победил есть.
Похваляющу мне твое житие, яко ко Христу дерзновение стяжав, от богатых Духа сокровищ каплю разума дати ми, молюся, яко да достойно похвалити тя возмогу, хвалы достойнаго.
Отечество наше возрадовашеся, яко виде в тебе, отче Иоанне, новаго светильника и молитвенника за Церковь нашу и за вся яже к тебе прибегнет с молитвою и прошением, ходатая тя имея пред Господом.
Юный возрастом был еси отче, но разумом старцы превзошел и мудро лето своея юности проводя под кровом храма Покрова Богородицы, Ея же яко лучезарную зарю в сердце своем имел еси, ныне же предстоиши Престолу Царя Славы со ангелы и лики святых, молим тя спастися молитвами твоими.
Богородичен: Приими от уст скверных хвалу, Дево Пречистая, Богородице чистая, Ты бо еси миру защищение и спасение, прилежно молим Тя спастися душам нашим.
Песнь 3
Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище и утверждение.
Разум твой отче просветлен бысть, яко дивно позна силу Божию, излиянную благодатно на тя Духом Святым, Его же действием и мы просветимся, отче всеблаженне Иоанне.
Аще и низу шествовал по земли, но сердце пребысть горе, волю Божию исполняя, пастырь добрый был еси стаду Христову, да и нас сопричтеши ко избранным овцам твоим, святче Божий преблаженне.
Возлюбив мудрости начало — страх Божий, и заповедям Его присно поучаяся, древом добрым насадился еси при исходищах вод духовных, от них же, отче, напояем, плод Христу принеслся еси.
Богородичен: Егда прииде Христос судити люди Своя, тогда и Ты, Пречистая Дево, буди ми помощница и молитвенница в день страшнаго Суда Божия.
Седален, глас 8:
Веры православныя украшение, Церкви Божия похвало и удобрение, отче праведный Иоанне, вся страждующия от себе не отверг еси и помощь духовную и телесную всякой душе христианской в жизни временней подавал еси. Ныне же душею преселился во обители Отца Небеснаго, телесем нетленным с нами пребываеши, да и мы прибегаем в скорбях и радостях наших к тебе, делателю добрый винограда Христова, не остави и нас, сирых и убогих, вопиющих ти тако: отче праведне Иоанне, спасай нас молитвами твоими.
Слава, и ныне, Богородичен:
О Тебе радуется, Благодатная, всякая тварь, ангельский собор и человеческий род, освященный храме и раю словесный, девственная похвало, из Нея же Бог воплотися и младенец бысть, прежде век сый Бог наш: ложесна бо Твоя престол сотвори и чрево Твое пространнее небес содела. О Тебе радуется, Благодатная, всякая тварь, слава Тебе.
Песнь 4
Ирмос: Вознесена Тя видевши Церковь на Кресте, Солнце праведное, ста в чине своем, достойно взывающи: слава силе Твоей, Господи.
Данный обет жития постническаго добре соблюл еси, аще и в мире пожил еси, но духом яко в пустыне пребыв, показуя нам путь правый ко спасению, исправити нам житие наше на тя зряще.
Ныне наста время ко Христу всем сердцем прилепитися и исполнити волю Его, твоему последующе примеру жития святаго, сице и в мире живуще отвержемся мира сего, и мир пустынею соделаем ко спасению душ наших.
Отверзи наш разум твоими молитвами, отче праведне, да и мы познаем волю Творца Небеснаго, блудное житие наше исправим и новую песнь Ему воспоим: молитвами праведника, Господи, спаси души наша.
Богородичен: Млеком питала еси, Дево, плотоносца Твоего Бога рожденнаго, яко да болезнь Адамову, сущую во аде, облегчит, от древа снедша знания и заповедь преслушания.
Песнь 5
Ирмос: Ты, Господи мой, свет в мир пришел еси, свет святый обращаяй из мрачна неведения верою воспевающия Тя.
Утешение бысть людям православным, отче Иоанне, егда славне мощи твоя обретоша, тогда воздаша хвалу Богови, и труды твоя со молитвы воспеша, почитающе, блаженне, память твою.
Имел еси мудрование во благочестии, свыше сподобился Божественнаго откровения, приходящих в вере наставляя и к покаянию всех призывая, возлюбити ближняго своего и брата не осудити, сподоби, блаженне, и нас сие исполнити.
Очесами зрим нетление телесе твоего на земли, имеюще мощи твоя святыя, яко залог любви ко стаду своему, дарова нам их Господь Промыслитель о людях своих, да взирающе на тя и мы исполним волю Его.
Богородичен: Агнице нескверна явилася нам Пресвятая Дево, яко плотию Христа родила еси, да тако и Дева в рождестве и по рождестве пребыла еси. Спаси и нас вопиющих: Мати Божия, слава Тебе.
Песнь 6
Ирмос: Пожру Ти со гласом хваления, Господи, Церковь вопиет Ти, от бесовския крове очищшеся, ради милости от ребр Твоих истекшею Кровию.
Наслаждатися небеснаго лицезрения Владыки Христа Бога нашего сподобился еси, блаженне Иоанне, в райских чертозех пребываеши днесь, телесем же твоим не оставил нас, грешных.
Нов явился ревнитель, яко вторый Моисей, не знаменми страшными удивляя, но Божественных словес учении наставляя, тихому пристанищу новаго Израиля от страстей Египта нас изводя.
Ум и душу твою направил к горнему Иерусалиму и нас сему поучал, блаженне Иоанне, како есть угождати Господеви и работати единому Господину, Творцу и Создателю нашему.
Богородичен: Помышляю Владычице страшное и скверное деяние мое и плачуся дел моих горько, но молитвами угодника Твоего Иоанна, да очистит Сын Твой, Христос Бог наш, душу мою от скверны и похоти блудныя.
Кондак, глас 6:
От чрева матери дивно прореченный, избранник Божий явился еси, не токмо в житии Богом прославленный, но и по смерти нас не оставивый, в дивном явлении руце за род православный ко Христу простирая, молися Владыце всех Царю, помиловати нас, чтущих святую память твою.
Икос:
Дух Святый во пророцех глаголавый и апостоли всю вселенную просветивый, мучеником крепость даровавый, и чрез святители веру православную уяснивый, Той же Дух и тя ко Христу приведе, обильно излияся на тя в житии твоем, ревнитель бо апостольских писаний был еси и преподобных отцев, похвало святителей и праведных сослужитель, Ангелов небесных сожителю, душу свою уготовал еси Господеви. Ныне же в небесных чертозех обитаеши, в телесе нетленном на земли почиваеши, не остави и нас грешных, почитающих присно святую память твою, отче праведне наш Иоанне.
Песнь 7
Ирмос: В пещи авраамстии отроцы персидстеи, любовию благочестия паче, нежели пламенем опаляеми взываху: благословен еси в храме славы Твоея, Господи.
Едем отверзеся тебе отче Иоанне, еще сый пребывая на земли телесем, но духом в Царствии Божиим обитал еси, пищи сладкия Царския, и нас не остави молитвами твоими.
Солнце праведное возсиял еси, отче, в мире сем, благодать дара прозрения от Господа сподобился еще на земле сый, многих от бед отвращая, отврати и мое сердце от злых дел мира сего.
Наше спасение Господь устрояя, пастыря добраго нам тебе показа, праведне отче Иоанне, да и мы последуем примеру твоему, обрящемся яко пастыри добрии, а не хищницы.
Богородичен: Пресвятая, Слово Святое рождшая, освяти наша души и телеса, блажащих Тя, Всенепорочная.
Песнь 8
Ирмос: Руце распростер Даниил, львов зияние в рове затче: огненную же силу угасиша, добродетелию препоясавшеся, благочестия рачители отроцы взывающе: благословите вся дела Господня Господа.
Роса благодатная душу твою ороси, отче блаженне, очисти и наша помышления сердечныя, да тобою наставляеми Богу взываем: благословите вся дела Господня Господа.
Аще и забвена быша память твоя, но Господь дивно прослави тя вновь, мы же Божие помышление о людях зряще, созерцая высшую мудрость Его, присно Ему взываем: благословите вся дела Господня Господа.
Возшел еси на высоту небесную и нас на земли не оставил, телесем нетленным с нами почиваеши, мы же зряще дивные дела Божия, во умилении сердцем взываем: благословите вся дела Господня Господа.
Богородичен: Единая имущая дерзновение, Владычице, за весь мир Христу молишися, не помяни безчисленных наших грехов, покрый люди Твоя омофором, вопиющия Богу умильным гласом: благословите вся дела Господня Господа.
Песнь 9
Ирмос: Камень нерукосечный, от несекомыя горы Тебе Дево краеугольный отсечеся, Христос, совокупивый разстоящаяся естества. Тем веселящеся Тя, Богородице, величаем.
Доброту видевше в тебе, отче праведный, притекаше к тебе вдовы и сироты, яко не оставиши их без помощи у тебе просящих, но даруеши им на потребу, да прославят Творца во веки.
Нищету духовную возлюбил, отче Иоанне, паче нежели богатство земное. Неимущим сие подавал еси, подаждь и нам твоими молитвами духом разумом и благочестием, да и мы сподобимся с тобою пребывати, идеже дух твой веселится.
Умильно молим тя, отче наш Иоанне, не остави нас погибнути в мире сем, не попусти стаду твоему ввергнутися в море страстей, но твоими молитвами и мы обрящемся в раи с тобою.
Богородичен: Юницу светлейшую и голубицу нескверную воспоим Пречистую Деву Марию, плотию родшую нам Христа Бога нашего, спасение бо Господь содела, Христос в вышних к нижним чрез Нея прейде, не рушил ключи девства Пресвятыя.
Светилен, глас 7:
Просвети, праведне, наша сердечныя очи, возрети на Божественную доброту. Освяти наша души и телеса, да достойно песнь хваления тебе приносим. Молися, отче наш Иоанне, за чтущия тя и верою почитающих память твою, присноблаженне.
Слава, и ныне, Богородичен:
Радуйся, Тебе зовем, Благословенная Богородице Дево, яко Тобою вечныя радости причастницы быхом, из Тебе бо возсия Христос Бог наш, да сиянием славы Отчия, просветит души наша.
На хвалитех стихиры на 4, глас 4:
Ныне наста время, прославляющее угодника Божия, совокупимся едины усты и единым сердцем, и тако возопиим тебе, отче: житие твое бысть славно и успение со святыми, Ангели Божии взяша пречистую душу твою, ко Творцу ю непорочну вознесоша, да вселишися со святыми воспевати вечно хвалебную песнь Ему: Господи, слава Тебе.
Отче блаженне, радостию велию возрадовашася превеликое множество чад твоих, днесь совокупльшеся в храме, яко прославити святую память твою, ты же, священниче Божий, не отыми милость твою от нас, но даровании Божественными излей богатно ю на стадо сие, яко молишися за овцы пажити твоея, юже Господь тебе уневести.
Днесь прославляем угодника Божия Иоанна, руце к небу воздевши, от сердца чиста и нескверна ко Господу зовем: слава Тебе, Господи, давшему нам звезду путеводящую; слава Тебе, Господи, показавшему нам свет в нощи; слава Тебе, Господи, прославивша праведнаго нетлением телеси; слава Тебе, Господи, приявши новаго молитвенника за ны грешныя.
Воздержанием и болезньми, скорбями и бедами многими, в молитве непрестанной душу и тело очисти, священниче Иоанне, сосуд избранный перед Богом явился, веру православную исповедуя, не токмо словом, но и житием образ бысть пастве твоей, тем же и прослави тя Господь, яко вернаго и добраго пастыря стада Его.
Слава, глас 6:
Припадаем ти, отче блаженне, взывающи к тебе: не остави нас убогих, в странствии земнаго жития сего. Утоли наша скорби и печали, приими слезы покаяния и любве. Подаждь нам от Всемилостиваго Спаса, твоими молитвами, пастырем ревность о Церкви Православней, всякой душе христианстей мир и благоденствие, да пребывше в радости душевной, прославим Господа, прославившего тя.
И ныне, Богородичен, глас той же:
Днесь мне возсияй свет разумнаго веселия, Ты бо еси Чистая свет и живот сущим во тьме: хотению бо мощна еси, и еже творити имаши яко сущи всех Владычица, избави всех от бед, и всех скорбящих от соблазн лукаваго.
На литургии
Блаженны от канона на 8, песнь 3 и 6.
Прокимен, глас 7:
Возвеселится праведник о Господе и уповает на Него.
Стих: Услыши, Боже, глас мой, внегда молитимися к Тебе.
Апостол, Соборнаго послания Иоаннова,
зачало 73 (глава 4, стихи 7-11).
Аллилуарий, глас 4:
Готово сердце его уповати на Господа.
Стих: Благ муж шедре и дая.
Евангелие от Луки, зачало 26
(глава 6, стихи 31-36).
Причастен: В память вечную будет праведник, от слуха зла не убоится.
(Служба святому праведному Иоанну Кормянскому печатается по изданию: “Житие святого праведного Иоанна Кормянского с приложением акафиста и службы”. - Гомель, “Фавор”, 2011. - С. 24-47)
Источник: Сайт "Святой праведный Иоанн Кормянский" [2011-12-12]
Статья опубликована участником [AngelinaD] 2016-03-08, последний раз редактировалась участником [tol] 2016-03-10. Со временем любая информация устаревает. Если Вы нашли ошибки или устаревшие сведения в этой статье, сообщите об этом.
В основной раздел 'Иоанн Кормянский, прав.'.